തിരുവനന്തപുരം: യൂത്ത് കോൺഗ്രസ് അധ്യക്ഷ സ്ഥാനത്തെ ചൊല്ലി തർക്കം മുറുകുന്നു. ഒ.ജെ. ജനീഷിനെ സംസ്ഥാന അധ്യക്ഷനായി പ്രഖ്യാപിച്ചതിന് പിന്നാലെയാണ് പ്രതിപക്ഷമായ ഐ ഗ്രൂപ്പില് അതൃപ്തി പൊട്ടിത്തെറിച്ചത്. അധ്യക്ഷ സ്ഥാനത്തിന് പ്രധാന മത്സരാര്ഥിയെന്ന നിലയില് പരിഗണിക്കപ്പെട്ടിരുന്ന അബിന് വര്ക്കിയെ ദേശീയ സെക്രട്ടറിയായി നിയമിച്ചതില് ഗ്രൂപ്പ് അനുകൂലര് നിരാശരായി. ഇന്ന് രാവിലെ കോഴിക്കോട് വച്ച് മാധ്യമങ്ങളെ കാണാന് പോകുന്ന അബിന് വര്ക്കി, തന്റെ അതൃപ്തി തുറന്നുപറയുമെന്നാണ് സൂചന. ഇതോടെ പുതിയ നേതൃത്വ പ്രഖ്യാപനത്തിന് പിന്നാലെ തന്നെ യൂത്ത് കോണ്ഗ്രസ് അകത്ത് അസന്തോഷം പൊങ്ങി.
പുതിയ ഭാരവാഹി പട്ടിക രൂപീകരണത്തില് ഗ്രൂപ്പ് താല്പര്യങ്ങളും സാമുദായിക പരിഗണനകളും പ്രധാനമായ പങ്കുവഹിച്ചു. അബിന് വര്ക്കിക്കുവേണ്ടി ഐ ഗ്രൂപ്പും, ബിനു ചുള്ളിയിലിനായി കെ.സി വേണുഗോപാല് പക്ഷവും, കെ.എം. അഭിജിത്തിനായി എ ഗ്രൂപ്പും ബലപരീക്ഷണം തുടങ്ങിയതോടെ, ഒടുവില് ഒ.ജെ. ജനീഷിന്റെ പേര് സമവായ നീക്കത്തില് മുന്നിലെത്തി. സംഘടനാ തെരഞ്ഞെടുപ്പില് ഏറ്റവും കൂടുതല് വോട്ടുകള് നേടിയ വൈസ് പ്രസിഡന്റായതിനാല് അധ്യക്ഷ സ്ഥാനത്തേക്ക് അബിന് വര്ക്കിക്കുള്ള സ്വാഭാവിക അവകാശം ഉന്നയിച്ചെങ്കിലും, എ ഗ്രൂപ്പിന്റെ നേതൃത്വത്തില് തുടര്ച്ച വേണമെന്ന വാദം ഉയര്ന്നു. ഇതോടെ രമേശ് ചെന്നിത്തല, എം.കെ. രാഘവന്, കെ.സി. വേണുഗോപാല് തുടങ്ങിയ നേതാക്കള് തമ്മിലുള്ള ആന്തരിക രാഷ്ട്രീയ നീക്കങ്ങള് വേഗത്തിലായി.
തര്ക്കം തീര്ക്കാനായാണ് പാര്ട്ടി ആദ്യമായി വര്ക്കിങ് പ്രസിഡന്റ് പദവി സൃഷ്ടിച്ച് ബിനു ചുള്ളിയിലിനെ ആ സ്ഥാനത്തേക്ക് നിയമിച്ചത്. അതേസമയം, അബിന് വര്ക്കിയെയും കെ.എം. അഭിജിത്തിനെയും ദേശീയ സെക്രട്ടറിമാരായി ഉയര്ത്തി, സംസ്ഥാന കമ്മിറ്റിയിലെ ഗ്രൂപ്പ് സംഘര്ഷങ്ങള് പരിഹരിക്കാന് ശ്രമിച്ചു. എ, ഐ, കെ.സി ഗ്രൂപ്പുകള്ക്കും ഷാഫി പറമ്പില് വിഭാഗത്തിനും തൃപ്തികരമാകുന്ന രീതിയിലാണ് ഒടുവില് ഭാരവാഹി പട്ടിക അംഗീകരിച്ചത്. എന്നിരുന്നാലും, പ്രഖ്യാപനത്തിനു പിന്നാലെ അബിന് വര്ക്കിയുടെ അതൃപ്തിയും ഐ ഗ്രൂപ്പിന്റെ അസന്തോഷവും സംഘടനാ അന്തരീക്ഷം കലുഷിതമാക്കുന്നുവെന്നതാണ് രാഷ്ട്രീയ നിരീക്ഷകരുടെ വിലയിരുത്തല്.
