വഖഫ് ബിൽ റിപ്പോർട്ട് ഇന്ന് പാർലമെൻറിൽ; പ്രതിപക്ഷ പ്രതിഷേധത്തിന് സാധ്യത, മാറ്റങ്ങളോടെ പാസാക്കാൻ കേന്ദ്രസർക്കാർ
ദില്ലി: വഖഫ് ബിൽ റിപ്പോർട്ട് ഇന്ന് പാർലമെൻറിൽ അവതരിപ്പിക്കും. ബിൽ ചർച്ച ചെയ്ത സംയുക്ത പാർലമെൻററി സമിതിയുടെ റിപ്പോർട്ടാണ് ഇന്ന് പാർലമെൻറിൽ വയ്ക്കുന്നത്. ലോക്സഭയിൽ സമിതി അദ്ധ്യക്ഷൻ ജഗദാംബിക പാലാകും റിപ്പോർട്ട് വയ്ക്കുക. നാടകീയ കാഴ്ചകൾക്കൊടുവിലാണ് വഖഫ് ബിൽ റിപ്പോർട്ട് സമിതി അംഗീകരിച്ചത്. പതിനാറ് ഭരണകക്ഷി അംഗങ്ങൾ പിന്തുണച്ചപ്പോൾ 11 പ്രതിപക്ഷ അംഗങ്ങൾ എതിർത്ത് വോട്ട് ചെയ്തിരുന്നു. ബിൽ സഭയിൽ വയ്ക്കുമ്പോൾ ഇന്ന് പ്രതിപക്ഷം പ്രതിഷേധിക്കാനാണ് സാധ്യത. ബജറ്റ് സമ്മേളനത്തിൻറെ രണ്ടാം ഘട്ടത്തിൽ മാറ്റങ്ങളോടെ ബിൽ പാസാക്കാനാണ് സർക്കാർ ലക്ഷ്യമിടുന്നത്.
