കണ്ണൂരിൽ ഒരു കിലോയിലധികം കഞ്ചാവുമായി അസം സ്വദേശി പിടിയിൽ

കണ്ണൂർ: നഗരത്തിൽ വിൽപനയ്ക്കായി എത്തിച്ച മാരക ലഹരിമരുന്നുമായി അസം സ്വദേശിയെ എക്സൈസ് സംഘം പിടികൂടി. അസം സ്വദേശിയായ ഷൗക്കത്ത് അലി (35) ആണ് കണ്ണൂർ എക്സൈസ് എൻഫോഴ്സ്‌മെന്റ് ആന്റ് ആന്റി നർകോട്ടിക് സ്പെഷ്യൽ സ്ക്വാഡിന്റെ പിടിയിലായത്. ഇയാളിൽ നിന്നും 1.185 കിലോ ഗ്രാം കഞ്ചാവ് ഉദ്യോഗസ്ഥർ കണ്ടെടുത്തു.

രഹസ്യ വിവരത്തിന് പിന്നാലെ നീക്കം

പുതിയതെരു, വളപട്ടണം, കീരിയാട് മേഖലകളിൽ കഴിഞ്ഞ കുറച്ചു ദിവസങ്ങളായി എക്സൈസ് സംഘം നിരീക്ഷണം ശക്തമാക്കിയിരുന്നു. എക്സൈസ് കമ്മീഷണർ സ്ക്വാഡ് അംഗങ്ങളായ പി.വി. ഗണേഷ് ബാബു, പി.പി. സുഹൈൽ എന്നിവർക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പ്രതിയെ വലയിലാക്കിയത്.

പരിശോധനാ സംഘം

എക്സൈസ് സർക്കിൾ ഇൻസ്പെക്ടറുടെ അധിക ചുമതല വഹിക്കുന്ന കെ. ഷാജിയുടെ നേതൃത്വത്തിലായിരുന്നു പരിശോധന. സംഘത്തിൽ ഇവരും ഉൾപ്പെട്ടിരുന്നു:

 * അസി. എക്സൈസ് ഇൻസ്പെക്ടർമാർ: ആർ.പി. അബ്‌ദുൽ നാസർ, പി. അനിൽകുമാർ, സി. അജിത്ത്.

 * പ്രിവന്റീവ് ഓഫീസർ: പി.പി. സുഹൈൽ.

 * സിവിൽ എക്സൈസ് ഓഫീസർമാർ: പി.വി. ഗണേഷ് ബാബു, എം.വി. ശ്യാം രാജ്, കെ.ടി. ഫസൽ, വി.കെ. സായൂജ്.

അറസ്റ്റ് ചെയ്ത പ്രതിയെ കോടതിയിൽ ഹാജരാക്കി. ലഹരി വിൽപന ശൃംഖലയിലെ കൂടുതൽ കണ്ണികളെ കണ്ടെത്താനായി അന്വേഷണം വ്യാപിപ്പിച്ചിട്ടുണ്ടെന്ന് എക്സൈസ് അധികൃതർ അറിയിച്ചു.