തിരുവനന്തപുരം: സംസ്ഥാന സര്ക്കാറിന്റെ ബോര്ഡ്, കോര്പറേഷന് പദവികള് അടക്കം ഒരു ഔദ്യോഗിക പദവികളും ഏറ്റെടുക്കാനില്ലെന്ന് മുതിര്ന്ന കോണ്ഗ്രസ് നേതാവ് വി.എം. സുധീരന് നിലപാട് വ്യക്തമാക്കിയതോടെ മുസ്ലിം ലീഗ് നേതാവും മുന് മന്ത്രിയുമായ എം.കെ. മുനീറിന് കാബിനറ്റ് പദവിയോടെ പുതിയ ചുമതല ലഭിക്കാന് സാധ്യത തെളിയുന്നു. മുന്പ് വി.എം. സുധീരന്റെ പേരുള്പ്പെടെ പരിഗണനയിലുണ്ടായിരുന്ന ഭരണ പരിഷ്കാര കമീഷന് ചെയര്മാന് സ്ഥാനത്തേക്ക് എം.കെ. മുനീറിനെ നിയോഗിക്കാനാണ് നിലവില് ധാരണയായിരിക്കുന്നത്.
ഇതുസംബന്ധിച്ച് യു.ഡി.എഫ് ഘടകകക്ഷികളുമായുള്ള ഉഭയകക്ഷി ചര്ച്ചകള് പൂര്ത്തിയായ ശേഷം സര്ക്കാര് ഔദ്യോഗിക തീരുമാനം പുറപ്പെടുവിക്കും. നിലവില് ബോര്ഡ്, കോര്പറേഷന് സ്ഥാനങ്ങളുടെ വിഭജനവുമായി ബന്ധപ്പെട്ട് യു.ഡി.എഫ് മുന്നണിയില് ചര്ച്ചകള് സജീവമായി പുരോഗമിക്കുകയാണ്. സ്ഥാനവിഭജനം സംബന്ധിച്ച് അന്തിമരൂപമുണ്ടാക്കാന് മുന്പ് ചേര്ന്ന യു.ഡി.എഫ് യോഗം കോണ്ഗ്രസ് നേതൃത്വത്തെ ചുമതലപ്പെടുത്തിയിരുന്നു.
മുന്നണിയിലെ അതത് ഘടകകക്ഷികളുമായി കോണ്ഗ്രസ് നേതൃത്വം നേരിട്ട് ഉഭയകക്ഷി ചര്ച്ചകള് നടത്തി തീരുമാനത്തിലെത്തട്ടെ എന്നതായിരുന്നു യു.ഡി.എഫ് യോഗത്തിലെ പൊതുധാരണ. ഇതിന്റെ അടിസ്ഥാനത്തിലാണ് ഉഭയകക്ഷി ചര്ച്ചകള്ക്ക് വേഗം കൂടിയത്. ചര്ച്ചകള് പുരോഗമിക്കവേ, മുസ്ലിം ലീഗിന് പുറമെ സമാന്തരമായി കേരള കോണ്ഗ്രസ് ജോസഫ് വിഭാഗവും മാണി സി. കാപ്പന്റെ എന്.സി.കെയും ക്യാബിനറ്റ് പദവികളുള്ള സുപ്രധാന പദവികള് ആവശ്യപ്പെട്ട് രംഗത്തെത്തിയിരുന്നു. വിവിധ ഘടകകക്ഷികളുടെ ആവശ്യങ്ങളില് മുസ്ലിം ലീഗ് മുന്നോട്ടുവെച്ച നിര്ദ്ദേശത്തിലാണ് ഇപ്പോള് പ്രാഥമിക ധാരണയായിട്ടുള്ളത്.
മുസ്ലിം ലീഗിലെ മുതിര്ന്ന നേതാവും മുന് മന്ത്രിയും കൊടുവള്ളി മുന് എം.എല്.എയുമായ എം.കെ. മുനീര് ഇത്തവണത്തെ നിയമസഭാ തെരഞ്ഞെടുപ്പില് മത്സരിച്ചിരുന്നില്ല. പാര്ട്ടിയിലും മുന്നണിയിലും സജീവമായി നില്ക്കുന്ന അദ്ദേഹത്തിന് അര്ഹമായ പദവി നല്കണമെന്ന ആവശ്യം ലീഗ് ശക്തമായി ഉന്നയിച്ചിരുന്നു.
മുഖ്യമന്ത്രി വി.ഡി. സതീശനും യു.ഡി.എഫ് കണ്വീനര് അടൂര് പ്രകാശും മുസ്ലിം ലീഗ് ഉന്നത നേതാക്കളുമായി നടത്തിയ നിര്ണ്ണായകമായ ചര്ച്ചയിലാണ് എം.കെ. മുനീറിന് ഭരണ പരിഷ്കാര കമീഷന് ചെയര്മാന് സ്ഥാനവും അതിലൂടെ കാബിനറ്റ് പദവിയും നല്കുന്ന കാര്യത്തില് അന്തിമ ധാരണയായത്. ഇതുസംബന്ധിച്ച ഔദ്യോഗിക പ്രഖ്യാപനം അടുത്ത യു.ഡി.എഫ് യോഗത്തിന് ശേഷമാകും ഉണ്ടാകുക.
അതേസമയം, മുന്നണിയിലെ മറ്റ് രണ്ട് ഘടകകക്ഷികളുടെ പദവികള് സംബന്ധിച്ച കാര്യത്തില് ഇനിയും പൂര്ണ്ണമായ തീരുമാനമായിട്ടില്ല. ഇവരുമായുള്ള ചര്ച്ചകള് ഇപ്പോഴും തുടരുകയാണ്. കേരള കോണ്ഗ്രസ് ജോസഫ് വിഭാഗം തങ്ങളുടെ പാര്ട്ടി ചെയര്മാന് പി.ജെ. ജോസഫിന് വേണ്ടി മുന്നോക്ക വികസന കോര്പറേഷന് ചെയര്മാന് സ്ഥാനം ആവശ്യപ്പെട്ടിട്ടുണ്ട്. മുന്നോക്ക വിഭാഗങ്ങളുടെ ക്ഷേമവുമായി ബന്ധപ്പെട്ട ബോര്ഡിന്റെ ചുമതല മുതിര്ന്ന നേതാവായ പി.ജെ. ജോസഫിന് നല്കണമെന്നാണ് പാര്ട്ടിയുടെ ആവശ്യം.
കൂടാതെ, മുന്നണി അധികാരത്തിലെത്തിയിട്ടും ഇത്തവണ മന്ത്രിസ്ഥാനം ലഭിക്കാത്ത സാഹചര്യത്തില് തനിക്ക് കാബിനറ്റ് പദവിയുള്ള പദവി നല്കണമെന്ന് മാണി സി. കാപ്പനും ആവശ്യപ്പെട്ടിട്ടുണ്ട്. എന്.സി.കെയുടെ ഈ ആവശ്യത്തിലും കോണ്ഗ്രസ് നേതൃത്വം ചര്ച്ചകള് നടത്തിവരികയാണ്. വരും ദിവസങ്ങളില് ഘടകകക്ഷി നേതാക്കളുമായി നടക്കുന്ന അവസാനവട്ട ചര്ച്ചകള് പൂര്ത്തിയാകുന്നതോടെ ബോര്ഡ്, കോര്പറേഷന് വിഭജനത്തിലെ പൂര്ണ്ണ ചിത്രം വ്യക്തമാകുകയും മുന്നണി യോഗത്തിന് ശേഷം ഔദ്യോഗിക ഉത്തരവുകള് പുറത്തുവരികയും ചെയ്യും.
