ചെന്നൈ: കേരളത്തിന് പിന്നാലെ അയൽസംസ്ഥാനമായ തമിഴ്‌നാട്ടിലും രൂക്ഷമായ വൈദ്യുതിക്ഷാമവും അപ്രഖ്യാപിത പവർകട്ടും സർക്കാരിന് വലിയ പ്രതിസന്ധി സൃഷ്ടിക്കുന്നു. വിവിധ ജില്ലകളിൽ തുടർച്ചയായി ഉണ്ടാകുന്ന വോൾട്ടേജ് ക്ഷാമവും മുൻകൂട്ടി അറിയിപ്പില്ലാത്ത വൈദ്യുതി മുടക്കവും മുഖ്യമന്ത്രി സി. ജോസഫ് വിജയ് നേതൃത്വം നൽകുന്ന ടിവികെ (തമിഴക വെട്രി കഴകം) സർക്കാരിന് കടുത്ത രാഷ്ട്രീയ വെല്ലുവിളിയായി മാറിയിരിക്കുകയാണ്. സംസ്ഥാനത്ത് അനുഭവപ്പെടുന്ന അടിയന്തര സാഹചര്യത്തിനെതിരെ പ്രതിപക്ഷ കക്ഷിയായ ഡിഎംകെ ശക്തമായ വിമർശനവുമായി രംഗത്തെത്തിയതിന് പുറമെ ഭരണമുന്നണി പങ്കാളിയായ വിസികെയും (വിടുതലൈ ചിരുതൈഗൽ കച്ചി) പരസ്യമായി അതൃപ്തി രേഖപ്പെടുത്തി.
വേല്ലൂരിൽ റവന്യൂ-ദുരന്തനിവാരണ വകുപ്പ് മന്ത്രി കെ.എ. സെങ്കോട്ടയ്യൻ മാധ്യമങ്ങളോട് സംസാരിച്ചുകൊണ്ടിരിക്കെ അപ്രതീക്ഷിതമായി വൈദ്യുതി ബന്ധം നിലച്ചത് തത്സമയം ചാനലുകളിലൂടെ പുറത്തുവന്നത് സർക്കാരിനെ വൻ പ്രതിരോധത്തിലാക്കി. കൂടാതെ, രാത്രികാലങ്ങളിലെ തുടർച്ചയായ പവർകട്ടിൽ പ്രതിഷേധിച്ച് സംസ്ഥാനത്തിന്റെ വിവിധ ഭാഗങ്ങളിൽ ജനങ്ങൾ തെരുവിലിറങ്ങി സമരം ആരംഭിച്ചതോടെ കാര്യങ്ങൾ കൂടുതൽ വഷളായിട്ടുണ്ട്.
രാത്രികളിൽ മണിക്കൂറുകളോളം വൈദ്യുതി തടസ്സപ്പെടുന്നത് പതിവായതോടെ വിവിധയിടങ്ങളിൽ റോഡ് ഉപരോധങ്ങൾ നടക്കുകയാണ്. തിരുച്ചിറപ്പള്ളി ജില്ലയിൽ മാത്രം കഴിഞ്ഞ ഒരാഴ്ചയ്ക്കിടെ മൂന്നിലധികം കേന്ദ്രങ്ങളിലാണ് നാട്ടുകാർ പ്രധാന പാതകൾ ഉപരോധിച്ചത്. സന്നസിപ്പട്ടി, സത്രപ്പട്ടി, അരിയവൂർ, അമ്മപ്പേട്ട എന്നീ പ്രദേശങ്ങളിൽ നിന്നുള്ള ഇരുന്നൂറിലധികം വരുന്ന ജനങ്ങൾ തിരുച്ചിറപ്പള്ളി-ദിണ്ടിഗൽ ദേശീയപാതയിലെ സത്രപ്പട്ടി ജംഗ്ഷൻ മൂന്ന് മണിക്കൂറോളം പൂർണ്ണമായി സ്തംഭിപ്പിച്ചു. തമിഴ്‌നാട് പവർ ഡിസ്ട്രിബ്യൂഷൻ കോർപ്പറേഷൻ ലിമിറ്റഡ് ഉദ്യോഗസ്ഥരും പൊലീസും എത്തി ദിവസങ്ങൾക്കകം പ്രശ്നപരിഹാരം വാഗ്ദാനം ചെയ്ത ശേഷമാണ് ഇവർ സമരം അവസാനിപ്പിച്ചത്.
സെപ്റ്റംബർ 4-ന് തിരുച്ചിറപ്പള്ളി-കരൂർ പാതയിലെ പെട്ടവായ്ത്തലയിലും സമാനമായ രീതിയിൽ കടുത്ത ഗതാഗത തടസ്സമുണ്ടായി. മണപ്പാറ, മുസിരി, തുറൈയൂർ, മണ്ണച്ചനല്ലൂർ തുടങ്ങിയ ഗ്രാമീണ മേഖലകളിലും സ്ഥിതി ഭിന്നമല്ല. എന്നാൽ ജനങ്ങളുടെ പ്രതിഷേധം രാഷ്ട്രീയ പ്രേരിതമാണെന്ന് തുറൈയൂർ എംഎൽഎയും ഡെപ്യൂട്ടി സ്പീക്കറുമായ എം. രവിശങ്കർ ആരോപിച്ചെങ്കിലും, വൈദ്യുതി ആവശ്യകത ഉയർന്നതോടെ ലോഡ്ഷെഡിംഗ് അനിവാര്യമായതാണെന്ന് ഉദ്യോഗസ്ഥർ സമ്മതിക്കുന്നുണ്ട്.
കഴിഞ്ഞ മൂന്നാഴ്ചയായി തുടരുന്ന കനത്ത ചൂട് മൂലം തിരുച്ചിറപ്പള്ളി ജില്ലയിൽ മാത്രം വൈദ്യുതി ആവശ്യകത 550 മെഗാവാട്ടായി ഉയർന്നതും കാറ്റിൽ നിന്നുള്ള വൈദ്യുതി ഉൽപ്പാദനത്തിൽ ഉണ്ടായ വീഴ്ചയുമാണ് പ്രതിസന്ധിക്ക് കാരണമെന്ന് അധികൃതർ ചൂണ്ടിക്കാട്ടുന്നു. തടസ്സം പരിഹരിക്കാൻ 2,000 മെഗാവാട്ട് വൈദ്യുതി സർക്കാർ അടിയന്തരമായി വാങ്ങിയതായും പവർ ഗ്രിഡ് സംരക്ഷിക്കാൻ നടപടിയെടുത്തതായും വൈദ്യുതി വകുപ്പ് മന്ത്രി സി.ടി.ആർ. നിർമ്മൽ കുമാർ അറിയിച്ചു. എന്നാൽ, വിജയ്‌യുടെ ഭരണപരിചയമില്ലായ്മയാണ് തമിഴ്‌നാടിനെ ഇരുട്ടിലാക്കിയതെന്ന് പ്രതിപക്ഷ നേതാവ് ഉദയനിധി സ്റ്റാലിനും, അധികാരത്തിലേറി കേവലം 120 ദിവസങ്ങൾക്കകം അപ്രഖ്യാപിത ലോഡ്ഷെഡിംഗ് അടിച്ചേൽപ്പിച്ചെന്ന് എഎംഎംകെ ജനറൽ സെക്രട്ടറി ടിടിവി ദിനകരനും കുറ്റപ്പെടുത്തി.
പ്രതിസന്ധി മറികടക്കാൻ സംസ്ഥാനത്തുടനീളം 231 പുതിയ സബ്സ്റ്റേഷനുകൾ നിർമ്മിക്കുന്നതിനായി 15,032 കോടി രൂപയുടെ പദ്ധതിക്ക് വിജയ് സർക്കാർ ഭരണാനുമതി നൽകിയിട്ടുണ്ട്. ഇതിനുപുറമെ, തകരാറുകൾ പരിഹരിക്കാൻ 15,058 ജീവനക്കാരെ പ്രത്യേകമായി അറ്റകുറ്റപ്പണികൾക്കായി നിയോഗിക്കുകയും രാത്രികാല ലോഡ് നേരിടാൻ സൗരോർജ്ജ സംഭരണ സംവിധാനങ്ങൾ വേഗത്തിലാക്കുകയും ചെയ്യുന്നുണ്ട്. എങ്കിലും, വരുംദിവസങ്ങളിൽ തടസ്സമില്ലാതെ വെളിച്ചം ഉറപ്പാക്കാൻ കഴിഞ്ഞില്ലെങ്കിൽ ജനകീയ പ്രതിഷേധങ്ങൾ കൂടുതൽ കനക്കുമെന്നാണ് സൂചനകൾ.
