സർക്കാർ ആശുപത്രികളിൽ അവശ്യ മരുന്നുകളുടെ ലഭ്യത ഉറപ്പാക്കാൻ പുതിയ നിരീക്ഷണ സംവിധാനം ഏർപ്പെടുത്തുമെന്ന് ആരോഗ്യവകുപ്പ് മന്ത്രി കെ. മുരളീധരൻ. ആശുപത്രികളിൽ മരുന്നുകൾ സ്റ്റോക്കുണ്ടെന്ന രേഖകളിലെ കണക്കുകൾക്കപ്പുറം രോഗികൾക്ക് യഥാസമയം മരുന്നുകൾ ലഭിക്കുന്നുണ്ടെന്ന് ഉറപ്പാക്കുകയാണ് ലക്ഷ്യമെന്ന് മന്ത്രി വ്യക്തമാക്കി.
മരുന്നുകളുടെ സ്റ്റോക്ക് മുൻകൂട്ടി നിരീക്ഷിച്ച് ക്ഷാമസാധ്യത തിരിച്ചറിഞ്ഞ് ആവശ്യമായ ഇടപെടൽ നടത്തുന്നതിനാണ് പുതിയ സംവിധാനം. ആശുപത്രികളിലെ യഥാർത്ഥ സ്റ്റോക്ക്, രോഗികളുടെ എണ്ണം, മരുന്നുകളുടെ ഉപയോഗം, വരും ദിവസങ്ങളിലെ ആവശ്യം, വിതരണത്തിലെ കാലതാമസം എന്നിവ വിലയിരുത്തും. ഇതിനായി ജില്ലാതല സമിതികൾ രൂപീകരിച്ച് ആശുപത്രികളിലെ ഫാർമസികളിലും സ്റ്റോറുകളിലും നേരിട്ട് പരിശോധന നടത്തും.
ഒരു ആശുപത്രിയിൽ അധികമായി ലഭ്യമായ മരുന്നുകൾ ആവശ്യമുള്ള മറ്റ് ആശുപത്രികളിലേക്ക് എത്തിക്കുന്നതിനും സമിതികൾ ഇടപെടും. നിലവിലുള്ള ചട്ടങ്ങൾ പാലിച്ച് മരുന്നുകളുടെ പുനർവിതരണം ഉറപ്പാക്കുന്നതിലൂടെ അടിയന്തര സാഹചര്യങ്ങളിൽ ലഭ്യമായ സ്റ്റോക്ക് കാര്യക്ഷമമായി വിനിയോഗിക്കാനാകുമെന്നാണ് വിലയിരുത്തൽ.
ഓരോ ആഴ്ചയും നേരിട്ടുള്ള പരിശോധനയുടെ അടിസ്ഥാനത്തിൽ മരുന്നുകളുടെ ലഭ്യത സംബന്ധിച്ച റിപ്പോർട്ട് തയ്യാറാക്കും. ജില്ലാ ജനറൽ ആശുപത്രികൾ വരെയുള്ള റിപ്പോർട്ടുകൾ ആരോഗ്യവകുപ്പ് ഡയറക്ടർക്കും മെഡിക്കൽ കോളേജുകളിലെ റിപ്പോർട്ടുകൾ മെഡിക്കൽ വിദ്യാഭ്യാസ ഡയറക്ടർക്കും സമർപ്പിക്കും. മരുന്നുകളുടെ ലഭ്യത, കുറവിന്റെ കാരണങ്ങൾ, കെ.എം.എസ്.സി.എൽ. വഴി ലഭിക്കാനുള്ള മരുന്നുകളുടെ വിവരം, സ്വീകരിച്ച പരിഹാര നടപടികൾ എന്നിവ റിപ്പോർട്ടിൽ ഉൾപ്പെടുത്തും.
ഗുരുതരമായ മരുന്നുക്ഷാമം കണ്ടെത്തിയാൽ പ്രതിവാര റിപ്പോർട്ടിനായി കാത്തിരിക്കാതെ അടിയന്തര നടപടി സ്വീകരിക്കണമെന്നും മന്ത്രി നിർദേശിച്ചു. മരുന്നുകളുടെ ലഭ്യതയുമായി ബന്ധപ്പെട്ട പ്രശ്നങ്ങളുടെ ഉത്തരവാദിത്തം പരസ്പരം കൈമാറുന്നതിന് പകരം, വീഴ്ച സംഭവിച്ച ഇടം കണ്ടെത്തി ഉടൻ പരിഹരിക്കുകയാണ് പുതിയ സംവിധാനത്തിന്റെ ലക്ഷ്യമെന്നും മന്ത്രി വ്യക്തമാക്കി
