ഏഴുവയസ്സുകാരിയെ പീഡിപ്പിച്ച കേസിൽ 69-കാരന് 23 വർഷം തടവ്
തലശ്ശേരി : ഏഴുവയസ്സുകാരിയെ പീഡിപ്പിച്ച കേസിൽ പോക്‌സോ നിയമത്തിലെ വിവിധ വകുപ്പുകൾ പ്രകാരം 23 വർഷം തടവിനും 75,000 രൂപ പിഴയടയ്ക്കാനും കോടതി ശിക്ഷിച്ചു. നീർവേലി കണ്ടംകുന്നിലെ സി. പുരുഷോത്തമനെയാണ് (69) തലശ്ശേരി അഡീഷണൽ ജില്ലാ സെഷൻസ് കോടതി (ഒന്ന്) ജഡ്ജി എ.വി. മൃദുല ശിക്ഷിച്ചത്.പിഴയടച്ചില്ലെങ്കിൽ നാലുമാസം തടവനുഭവിക്കണം. പിഴ തുക കുട്ടിക്ക് നൽകണം. 2018 ഓഗസ്റ്റിലാണ് സംഭവം. കൂത്തുപറമ്പ് പോലീസ് രജിസ്റ്റർ ചെയ്ത കേസിൽ ഇൻസ്‌പെക്ടറായിരുന്ന ബി. രാജേന്ദ്രനാണ് അന്വേഷണം നടത്തിയത്. പ്രോസിക്യൂഷനുവേണ്ടി സ്‌പെഷ്യൽ പ്രോസിക്യൂട്ടർ ബീന കാളിയത്ത് ഹാജരായി.