ന്യൂഡൽഹി: ദേശീയപാതാ അതോറിറ്റിയായ എൻഎച്ച്‌എഐ, ഫാസ്ടാഗ് അനിയമമായ രീതിയിൽ ഉപയോഗിക്കുന്നതിനെതിരെയും നിയമലംഘനങ്ങളെയും കുറിച്ച് കടുത്ത നിലപാട് സ്വീകരിച്ചു. ഇനി മുതൽ വാഹനത്തിന്റെ മുൻചില്ലിൽ ഫാസ്ടാഗ് പതിപ്പിക്കാതെ ടോൾപ്ലാസുകൾ ഉപയോഗിക്കുന്ന വാഹനങ്ങൾ കരിമ്പട്ടികയിൽപ്പെടുത്തുമെന്ന് എൻഎച്ച്‌എഐ അറിയിച്ചു. ഫാസ്ടാഗ് ശരിയായ സ്ഥാനത്ത് പതിച്ചിട്ടില്ലെങ്കിൽ അത് വായിക്കപ്പെടാതെ ടോൾപിരിവ് തടസപ്പെടുകയും, മറ്റ് വാഹനങ്ങൾക്കുള്ള ഗതാഗതവും വൈകുകയും ചെയ്യുന്ന പ്രശ്‌നങ്ങൾ ഉണ്ടാകുന്നു.
ഫാസ്ടാഗ് ഉപയോഗിക്കുന്നത് തടയുന്നതിന്റെ ഭാഗമായാണ് ഈ കർശന നടപടി. ചില വാഹന ഉടമകൾ ബോധപൂർവം ഫാസ്ടാഗ് പിന്‍വശത്തോ അല്ലാതെയുള്ള സ്ഥാനങ്ങളിലോ പതിപ്പിക്കുന്നത് പതിവാണ്. ഇത്തരത്തിൽ ശരിയായ രീതിയിൽ സെൻസർ വഴിയുള്ള സ്കാനിങ് നടക്കാതെ ടോൾ അടയ്ക്കാതെ പോകാൻ അവസരം കിട്ടുന്നതായി അധികൃതർ കണ്ടെത്തിയിട്ടുണ്ട്. ഇത് നിയമലംഘനമായതിനാൽ ഇത്തരം വാഹനങ്ങൾ കരിമ്പട്ടികയിൽ ഉൾപ്പെടുത്തുമെന്ന് എൻഎച്ച്‌എഐ വ്യക്തമാക്കിയിട്ടുണ്ട്.
ഫാസ്ടാഗിന്റെ കാര്യക്ഷമത ഉറപ്പാക്കാനും ഗതാഗതം സുഗമമാക്കാനും ഈ നടപടികൾ അനിവാര്യമാണെന്നാണ് എൻഎച്ച്‌എഐയുടെ വിശദീകരണം. കാർ, വാൻ, ജീപ്പ് തുടങ്ങിയ കാറ്റഗറിയിലുള്ള വാഹനങ്ങൾക്ക് വിൻഡ്ഷീൽഡിൽ നടുവിലായും മുകളിലായും ഫാസ്ടാഗ് പതിപ്പിച്ചിരിക്കണം. നേരത്തെ നിരവധി വാഹന ഉടമകൾ ഫാസ്ടാഗ് കൃത്യമായി ഉപയോഗിക്കാതിരുന്നത് വലിയ ഗതാഗതക്കുരുക്കുകളും സാമ്പത്തിക നഷ്ടങ്ങളും ഉണ്ടാക്കിയിട്ടുണ്ടെന്ന് അധികൃതർ ചൂണ്ടിക്കാണിച്ചു. ഇനി മുതൽ ഈ നിർദ്ദേശങ്ങൾ ലംഘിക്കുന്നവർക്ക് കനത്ത ശിക്ഷ ലഭിക്കുമെന്ന് എൻഎച്ച്‌എഐ മുന്നറിയിപ്പ് നൽകി.
