പയ്യന്നൂർ: നിയമസഭാ തിരഞ്ഞെടുപ്പ് പ്രചാരണം ഉച്ചസ്ഥായിയിലെത്തിനിൽക്കെ, പയ്യന്നൂരിൽ എൽഡിഎഫ് സ്ഥാനാർത്ഥികളുടെ പൊതുസമ്മേളനത്തിൽ ആത്മവിശ്വാസം പ്രകടിപ്പിച്ച് മുഖ്യമന്ത്രി പിണറായി വിജയൻ (Pinarayi Vijayan Payyanur Speech). പയ്യന്നൂരിൽ ആര് എതിര് വന്നാലും ഒരു ചുക്കും സംഭവിക്കില്ലെന്നും പവിത്രമായ ഈ മണ്ണിനെ കളങ്കപ്പെടുത്താൻ ആർക്കും സാധിക്കില്ലെന്നും അദ്ദേഹം പറഞ്ഞു.
പയ്യന്നൂർ രക്തസാക്ഷികളുടെയും കണിശത പാലിച്ച നേതാക്കളുടെയും നാടാണെന്ന് മുഖ്യമന്ത്രി ഓർമ്മിപ്പിച്ചു. പ്രതിസന്ധികളിൽ പാറ പോലെ പാർട്ടിക്കൊപ്പം ഉറച്ചുനിൽക്കുന്നവരാണ് ഇവിടുത്തെ ജനങ്ങൾ. പയ്യന്നൂരിലെ എൽഡിഎഫ് സ്ഥാനാർത്ഥി ടി.ഐ. മധുസൂദനന്റെ വിജയത്തിനായി മുഖ്യമന്ത്രി അഭ്യർത്ഥിച്ചു. പയ്യന്നൂർ കരുത്തുറ്റ ഇടത് കോട്ടയായി തുടരുമെന്നും അദ്ദേഹം കൂട്ടിച്ചേർത്തു.
തളിപ്പറമ്പിലെ യുഡിഎഫ് പിന്തുണയുള്ള സ്വതന്ത്ര സ്ഥാനാർത്ഥി ടി.കെ. ഗോവിന്ദനെതിരെ മുഖ്യമന്ത്രി കടുത്ത ഭാഷയിലാണ് പ്രതികരിച്ചത്.
സ്ഥാനമോഹം കൊണ്ട് എത്ര വലിയ ചെളിക്കുണ്ടിലാണ് ഇയാൾ വീണതെന്ന് പിണറായി വിജയൻ ചോദിച്ചു. അവസരവാദത്തിന്റെ മൂർത്തിഭാവത്തെയാണ് കോൺഗ്രസ് കൂടെ കൂട്ടിയിരിക്കുന്നതെന്നും അദ്ദേഹം പരിഹസിച്ചു.
തിരഞ്ഞെടുപ്പ് ചൂടിലമർന്ന കണ്ണൂർ ജില്ലയിൽ മുഖ്യമന്ത്രിയുടെ ഈ പ്രസ്താവനകൾ ഇടത് ക്യാമ്പുകൾക്ക് വലിയ ആവേശം പകർന്നിരിക്കുകയാണ്
