കേരളത്തില് ഉഷ്ണതരംഗത്തിന് സാധ്യത; മൂന്ന് ജില്ലകളില് ഓറഞ്ച് അലേര്ട്ട്
തിരുവനന്തപുരം: കേരളത്തില് കടുത്ത ഉഷ്ണതരംഗത്തിന് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. പാലക്കാട്, കൊല്ലം, തൃശ്ശൂര് ജില്ലകളില് ഇന്നും നാളെയും ഓറഞ്ച് അലേര്ട്ട് പ്രഖ്യാപിച്ചു. സാധാരണയേക്കാള് 5 ഡിഗ്രി സെല്ഷ്യസ് വരെ താപനില ഉയരാന് സാധ്യതയുള്ളതിനാല് ജനങ്ങള് അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദേശിച്ചു.
പാലക്കാട് ജില്ലയില് താപനില 41 ഡിഗ്രിസെല്ഷ്യസ് വരെ ഉയര്ന്നേക്കും. കൊല്ലം, തൃശൂര് ജില്ലകളില് 40 ഡിഗ്രിസെല്ഷ്യസ് വരെയും കോട്ടയം, പത്തനംതിട്ട, എറണാകുളം, കോഴിക്കോട് ജില്ലകളില് 38 ഡിഗ്രിസെല്ഷ്യസ് വരെയും ചൂട് കൂടും. ആലപ്പുഴ, മലപ്പുറം, കണ്ണൂര്, കാസർകോട് ജില്ലകളില് 37 ഡിഗ്രിസെല്ഷ്യസ് വരെയും തിരുവനന്തപുരത്ത് 36 ഡിഗ്രിസെല്ഷ്യസ് വരെയും താപനില ഉയരാന് സാധ്യതയുണ്ട്.
കണ്ണൂരില് സൂര്യാഘാതമേറ്റ് ഇന്ന് യുവാവ് മരിച്ചു. കണ്ണൂര് പള്ളിപ്പൊയില് സ്വദേശി സനല് കുമാര് എം വിയാണ് മരിച്ചത്. 37 വയസ്സ് മാത്രമാണ് പ്രായം. പള്ളിപ്പൊയിലില് കിണര് കുഴിക്കുന്ന ജോലിക്കിടെയാണ് സൂര്യാഘാതമേറ്റത്. ജോലിക്കിടെ ഇന്നലെയാണ് ശാരീരിക ബുദ്ധിമുട്ടുകള് അനുഭവപ്പെട്ടത്.ശാരീരിക അസ്വാസ്ഥ്യത്തെ തുടര്ന്ന് ആശുപത്രിയില് പ്രവേശിപ്പിച്ചിരുന്നു. ചികിത്സയിലിരിക്കെ ഇന്ന് പുലര്ച്ചെ മൂന്നുമണിയോടെ മരിക്കുകയായിരുന്നു. സൂര്യാഘാതമാണ് മരണകാരണമെന്ന് ഡോക്ടര്മാര് വ്യക്തമാക്കി.
