മട്ടന്നൂരിൽ വീടിൻ്റെ ബാൽക്കണിയിൽ നിന്ന് മുറ്റത്തേക്ക് വീണ് ക്രഷർ ഉടമ മരിച്ചു
മട്ടന്നൂർ: വീടിൻ്റെ ബാൽക്കണിയിൽ നിന്ന് മുറ്റത്തേക്ക് വീണ് ക്രഷർ ഉടമ മരിച്ചു. വെള്ളിയാംപറമ്പ് സമ്പത്ത് സ്റ്റോൺ ക്രഷർ മാനേജിംഗ് ഡയറക്ടറും സാമൂഹിക സാംസ്കാരിക രംഗങ്ങളിലെ നിറസാന്നിധ്യവുമായ കിഴക്കയിൽ ബോബി ജോസ് (47) ആണ് മരിച്ചത്.
ഇന്നലെ ഉച്ചക്ക് ഒന്നരയോടെ വെള്ളിയാംപറമ്പിലെ വീടിൻ്റെ ഒന്നാം നിലയിലെ ബാൽക്കണിയിൽ നിന്ന് അബദ്ധത്തിൽ മുറ്റത്തേക്ക് വീഴുകയായിരുന്നു. ഗുരുതരമായി പരിക്കേറ്റ് കണ്ണൂരിലെ സ്വകാര്യ ആശുപത്രിയിൽ ചികിത്സയിലിരിക്കെ അർധരാത്രിയോടെയാണ് മരിച്ചത്.
പരേതനായ കിഴക്കയിൽ ജോസ് ജോർജ്- മേരി ജോസ് എന്നിവരുടെ മകനാണ്. ഭാര്യ: റാണി ബോബി (അധ്യാപിക, ചെമ്പന്തൊട്ടി യുപി സ്കൂൾ). മകൾ: ആൻട്രിയ (വിദ്യാർഥി, ശിവപുരം ഹയർ സെക്കൻഡറി സ്കൂൾ). സഹോദരങ്ങൾ: സിറിൾ ജോസ്, ബ്രിജീന ജോസ്. സംസ്കാരം ഇന്ന് ശനിയാഴ്ച വൈകീട്ട് കൂത്തുപറമ്പ് നിർമലഗിരി സെന്റ് മേരീസസ് ചർച്ചിൽ നടക്കും.
