ഹ്യൂസ്റ്റൺ: ഫിഫ ലോകകപ്പിൽ ചരിത്രം തിരുത്തിക്കുറിച്ച് പോർച്ചുഗൽ സൂപ്പർ താരം ക്രിസ്റ്റ്യാനോ റൊണാൾഡോ. ഗ്രൂപ്പ് കെയിൽ ഉസ്ബെക്കിസ്ഥാനെതിരായ മത്സരത്തിൽ ഗോൾ നേടിയതോടെ, ആറ് ലോകകപ്പുകളിൽ ഗോൾ നേടുന്ന ആദ്യ താരമെന്ന സുവർണ്ണ നേട്ടമാണ് റൊണാൾഡോ സ്വന്തമാക്കിയത്. മത്സരത്തിന്റെ ആറാം മിനിറ്റിലായിരുന്നു റൊണാൾഡോയുടെ ചരിത്രഗോൾ.
റൊണാൾഡോയ്ക്ക് പിന്നാലെ പതിനേഴാം മിനിറ്റിൽ നൂനോ മെൻഡസ് കൂടി ലക്ഷ്യം കണ്ടതോടെ ആദ്യ ഹൈഡ്രേഷൻ ബ്രേക്കിൽ തന്നെ പോർച്ചുഗൽ 2-0 എന്ന നിലയിൽ മികച്ച ലീഡ് സ്വന്തമാക്കി. ഡി.ആർ കോംഗോയുമായുള്ള ആദ്യ മത്സരം 1-1 എന്ന നിലയിൽ സമനിലയിൽ പിരിഞ്ഞ പോർച്ചുഗലിന് ഈ വിജയം ഏറെ നിർണ്ണായകമാണ്. അതേസമയം, തങ്ങളുടെ ആദ്യ മത്സരത്തിൽ കൊളംബിയയോട് 0-2 എന്ന സ്കോറിന് പരാജയപ്പെട്ട ഉസ്ബെക്കിസ്ഥാൻ കടുത്ത സമ്മർദ്ദത്തിലാണ്.
തുടക്കം മുതൽ മത്സരത്തിൽ വ്യക്തമായ ആധിപത്യം പുലർത്താൻ പോർച്ചുഗലിനായിട്ടുണ്ട്. ഉസ്ബെക്കിസ്ഥാൻ താരങ്ങൾക്ക് പോർച്ചുഗീസ് പ്രതിരോധത്തെ കാര്യമായി വെല്ലുവിളിക്കാൻ ഇതുവരെ സാധിച്ചിട്ടില്ല. തുടർച്ചയായ മുന്നേറ്റങ്ങളിലൂടെ ഉസ്ബെക്കിസ്ഥാൻ പ്രതിരോധത്തെ നിരന്തരം സമ്മർദ്ദത്തിലാക്കുന്നുണ്ട്.
