മട്ടാഞ്ചേരി: ഡല്ഹി ജന്തര് മന്തറില് പ്രതിഷേധിച്ച വിദ്യാര്ത്ഥികള്ക്കും സ്ത്രീകള്ക്കുമെതിരെ അതിരൂക്ഷമായ വിദ്വേഷ പരാമര്ശങ്ങളും വംശഹത്യാ ആഹ്വാനവും നടത്തിയ കേസില് ടി.ജി. മോഹന്ദാസിനെ കേരള പോലീസ് കസ്റ്റഡിയിലെടുത്തു. എറണാകുളം മട്ടാഞ്ചേരിയിലുള്ള ഇയാളുടെ വീട്ടിലെത്തിയാണ് തിരുവനന്തപുരത്ത് നിന്നുള്ള പ്രത്യേക സൈബര് പോലീസ് സംഘം ഇയാളെ കസ്റ്റഡിയിലെടുത്തത്.
ടി.ജി. മോഹന്ദാസിന്റെ വസതിയില് വെച്ച് പോലീസ് ഉദ്യോഗസ്ഥര് ചോദ്യം ചെയ്യല് തുടരുകയാണ്. കേസിനാസ്പദമായ യൂട്യൂബ് വീഡിയോകള് ചിത്രീകരിച്ച ഡിജിറ്റല് ഉപകരണങ്ങള് കണ്ടെത്തുന്നതിനും തെളിവുകള് ശേഖരിക്കുന്നതിനുമായാണ് പോലീസ് സംഘം വീട്ടില് പരിശോധന നടത്തിയത്. ചോദ്യം ചെയ്യല് നടപടികള് പൂര്ത്തിയാക്കിയ ശേഷം രാത്രിയോടെ ഇയാളെ തിരുവനന്തപുരത്തേക്ക് കൊണ്ടുപോകും.
നാളെ രാവിലെ വൈദ്യപരിശോധന ഉള്പ്പെടെയുള്ള ഔദ്യോഗിക നടപടിക്രമങ്ങള് പൂര്ത്തിയാക്കിയ ശേഷം ഇയാളെ തിരുവനന്തപുരത്തെ കോടതിയില് ഹാജരാക്കാനാണ് പോലീസിന്റെ നീക്കം. ഡല്ഹിയില് നടന്ന വിദ്യാര്ത്ഥി പ്രതിഷേധത്തില് പങ്കെടുത്ത യുവതികളെയും വിദ്യാര്ത്ഥികളെയും ലക്ഷ്യമിട്ട് കടുത്ത അധിക്ഷേപ പരാമര്ശങ്ങളാണ് ഇയാള് നടത്തിയത്.
ഡല്ഹിയില് കര്ഫ്യൂ പ്രഖ്യാപിച്ച ശേഷം പ്രക്ഷോഭകരായ വിദ്യാര്ത്ഥികള്ക്ക് നേരെ വെടിവെപ്പ് നടത്തണമെന്നായിരുന്നു ഇയാള് തന്റെ സോഷ്യല് മീഡിയ ചാനലിലൂടെ ആഹ്വാനം ചെയ്തത്. 'എനിക്ക് ഈ സാഹചര്യം കൈയില് കിട്ടിയാല് നാല് ചതുരശ്ര കിലോമീറ്റര് ചുറ്റളവില് കര്ഫ്യൂ പ്രഖ്യാപിക്കും. ജനക്കൂട്ടത്തോട് പിരിഞ്ഞുപോകാന് മൂന്നുതവണ മൈക്കില് ആവശ്യപ്പെടും. പിന്നെ വെടിവെക്കും. ആളുകള് ചിതറിയോടും. കുറേപ്പേര് മരിക്കും. കുറേപ്പേര് മരിക്കില്ല. കുറേപ്പേര്ക്ക് അംഗഭംഗം സംഭവിക്കും' എന്നായിരുന്നു മോഹന്ദാസിന്റെ വിവാദ പരാമര്ശങ്ങള്.
വെടിവെപ്പ് ആഹ്വാനത്തിന് പുറമെ സമരരംഗത്തുള്ള സ്ത്രീകളെയും പെണ്കുട്ടികളെയും ലൈംഗികമായി അധിക്ഷേപിക്കുന്ന വാദങ്ങളും ഇയാള് ഉയര്ത്തിയിരുന്നു. പ്രക്ഷോഭകര്ക്കിടയിലേക്ക് പോലീസിനെ പിന്വലിച്ചാല് അവിടെ കൂട്ടബലാത്സംഗം നടക്കുമെന്നും, ബലാത്സംഗം ഇഷ്ടപ്പെടുന്ന സ്ത്രീകളും പെണ്കുട്ടികളുമാണ് സമരത്തില് പങ്കെടുക്കുന്നതെന്നുമാണ് ഇയാള് വീഡിയോയില് പറഞ്ഞത്.
ഇടതുപക്ഷ, മതനിരപേക്ഷ വിഭാഗങ്ങളില്പ്പെട്ട പെണ്കുട്ടികളെയും യുവജനങ്ങളെയും അങ്ങേയറ്റം നീചമായ ഭാഷയിലാണ് ഇയാള് വിശേഷിപ്പിച്ചത്. പ്രക്ഷോഭങ്ങള്ക്കിടയില് ആരെങ്കിലും കൊല്ലപ്പെട്ടാല് അവര് അടുത്ത രക്തസാക്ഷികളായി മാറുമെന്ന തരത്തിലുള്ള അധിക്ഷേപങ്ങളും ഇയാള് തുടര്ച്ചയായി പങ്കുവെച്ച വീഡിയോകളില് ഉണ്ടായിരുന്നു.
സംഭവത്തില് തിരുവനന്തപുരം സിറ്റി സൈബര് ക്രൈം പോലീസ് കേസെടുത്ത് പത്ത് ദിവസത്തിലേറെയായിട്ടും ഇയാള്ക്കെതിരെ തുടര്നടപടികള് വൈകുന്നതില് വലിയ രീതിയിലുള്ള ജനരോഷവും രാഷ്ട്രീയ വിമര്ശനങ്ങളും ഉയര്ന്നുവന്നിരുന്നു. വിദ്വേഷ ആഹ്വാനം നടത്തിയ കേസിലെ പ്രതിയെ സംരക്ഷിക്കുന്നുവെന്ന ആരോപണം ശക്തമായതോടെയാണ് പോലീസിന്റെ ഭാഗത്തുനിന്ന് നിര്ണ്ണായകമായ ഈ നീക്കമുണ്ടായത്. കലാപാഹ്വാനം ഉള്പ്പെടെയുള്ള ഗുരുതര വകുപ്പുകള് ചുമത്തിയാണ് തിരുവനന്തപുരം സിറ്റി സൈബര് പോലീസ് ഇയാള്ക്കെതിരെ കേസ് രജിസ്റ്റര് ചെയ്തിരിക്കുന്നത്. സൈബര് ഓപ്പറേഷന്സ് വിഭാഗത്തിന്റെ നേരിട്ടുള്ള മേല്നോട്ടത്തിലാണ് നിലവില് അന്വേഷണം പുരോഗമിക്കുന്നത്.
മുമ്പ് അര്ദ്ധരാത്രിയില് അര്ജുന് ആയങ്കിയെ പൊക്കിയതുപോലെ, ജനരോഷം ശക്തമായ പശ്ചാത്തലത്തില് വൈകുന്നേരത്തോടെ വിവാദ പ്രാസംഗികനെയും തൂക്കിയെടുക്കുന്ന കര്ശന നടപടിയിലേക്കാണ് കേരള പോലീസ് കടന്നിരിക്കുന്നത്. സമൂഹത്തിലും വിദ്യാര്ത്ഥികള്ക്കിടയിലും വിദ്വേഷവും സംഘര്ഷവും വളര്ത്താന് ശ്രമിച്ച പ്രതിക്കെതിരെ ശക്തമായ തെളിവുകള് ശേഖരിച്ച് മുന്നോട്ട് പോകാനാണ് അന്വേഷണ സംഘത്തിന്റെ തീരുമാനം.
