ചാച്ചാജിയുടെ ഓര്‍മ്മയില്‍ ശിശുദിനം; പ്രധാനമന്ത്രിയും രാഷ്ട്രപതിയുമായി കുട്ടികള്‍
ശുഭ്ര വസ്ത്രത്തില്‍ റോസാപ്പൂ ധരിച്ച് കുട്ടികളുടെ പ്രധാനമന്ത്രിയും രാഷ്ട്രപതിയും സ്പീക്കറും. ശുഭ്രവസ്ത്ര ധാരികളായ അവര്‍ ബാന്റുവാദ്യത്തിന്റെ അകമ്പടിയോടെ തുറന്ന ജീപ്പില്‍ പരേഡിനെ നയിച്ചു. ജില്ലാ ശിശുക്ഷേമ സമിതിയും വിദ്യാഭ്യാസ വകുപ്പും സംയുക്തമായി കണ്ണൂരില്‍ സംഘടിപ്പിച്ച ശിശുദിന റാലിയാണ് ഇന്ത്യയുടെ പ്രഥമ പ്രധാനമന്ത്രി ജവഹര്‍ലാല്‍ നെഹ്റുവിന്റെ ഓര്‍മ്മ പുതുക്കലായത്.
കണ്ണൂര്‍ പൊലീസ് പരേഡ് ഗ്രൗണ്ടില്‍ നിന്നായിരുന്നു റാലിയുടെ തുടക്കം. ശിശുക്ഷേമ സമിതിയുടെ സാഹിത്യ രചന-പ്രസംഗ മത്സര വിജയികള്‍ കുട്ടി നേതാക്കളായി റാലി നയിച്ചു. അഴീക്കോട് എച്ച് എസ്, രാജാസ് എച്ച് എസ്, ചൊവ്വ എച്ച് എസ്, തോട്ടട ജി എച്ച് എസ്, കൂടാളി എച്ച് എസ്, ടൗണ്‍ എച്ച് എസ്, സെന്റ് തെരേസാസ് എച്ച് എസ്, സിറ്റി എച്ച് എസ്, പുഴാതി എച്ച് എസ്, സെന്റ് മൈക്കിള്‍സ് എച്ച് എസ്, ചേലോറ ജി എച്ച് എസ്, പയ്യാമ്പലം ഗേള്‍സ് ഹയര്‍ സെക്കണ്ടറി എന്നീ സ്‌കൂളുകളിലെ എന്‍ സി സി, എസ് പി സി, സ്‌കൗട്ട് ആന്റ് ഗൈഡ്സ്, ജെ ആര്‍ സി കേഡറ്റുകള്‍ അണിനിരന്നു. എ ഡി എം കെ കെ ദിവാകരന്‍ ഫ്ളാഗ് ഓഫ് ചെയ്തു.
തുടര്‍ന്ന് കണ്ണൂര്‍ മുന്‍സിപ്പല്‍ ഹയര്‍സെക്കണ്ടറി സ്‌കൂളില്‍ നടന്ന പൊതുയോഗം കുട്ടികളുടെ പ്രധാനമന്ത്രി ഇരിണാവ് യുപി സ്‌കൂളിലെ നാലാം ക്ലാസുകാരി റിസ ഫൈസല്‍ ഉദ്ഘാടനം ചെയ്തു. കുട്ടികളുടെ പ്രസിഡണ്ട് ഇരിണാവ് യുപി സ്‌കൂളിലെ ആറാം ക്ലാസുകാരി വൈഗ ലഗേഷ് അധ്യക്ഷത വഹിച്ചു. തഹസില്‍ദാര്‍ എം ടി സുരേഷ് ചന്ദ്രബോസ് ശിശുദിന സ്റ്റാമ്പ് പ്രകാശനം ചെയ്തു. മേയര്‍ അഡ്വ. ടി ഒ മോഹനന്‍, കെ വി സുമേഷ് എം എല്‍ എ, ജില്ലാ ശിശുക്ഷേമ സമിതി വൈസ് പ്രസിഡണ്ട് മുടപ്പത്തി നാരായണന്‍, സെക്രട്ടറി പി സുമേശന്‍ മാസ്റ്റര്‍, ട്രഷറര്‍ കെ എം രസില്‍രാജ്, ശിശുക്ഷേമ സമിതി എക്സിക്യൂട്ടീവ് കമ്മിറ്റി അംഗങ്ങളായ ടി വി രഞ്ജിത്ത്, പ്രവീണ്‍ രുഗ്മ, രവീന്ദ്രന്‍ എടക്കാടന്‍, അഴീക്കോടന്‍ ചന്ദ്രന്‍, എസ് പി സി ജില്ലാ-കോര്‍ഡിനേറ്റര്‍ രാജേഷ്, ജെ ആര്‍ സി ജില്ലാ- കോ ഓര്‍ഡിനേറ്റര്‍ എന്‍ ടി സുധീന്ദ്രന്‍, സ്‌കൗട്ട് കോ-ഓര്‍ഡിനേറ്റര്‍ എം പ്രീത എന്നിവര്‍ പങ്കെടുത്തു. ശിശുക്ഷേമ സമിതി നടത്തിയ വിവിധ മത്സര വിജയികള്‍ക്കുള്ള സമ്മാനദാനവും നടന്നു.