സ്കൂൾ മുറ്റത്തെ അഞ്ച് തണൽ മരങ്ങൾ മുറിച്ച് നീക്കി: മാനേജ്മെൻ്റിനെതിരെ പ്രതിഷേധവുമായി വിദ്യാർത്ഥികൾ

സ്കൂൾ മുറ്റത്തെ അഞ്ച് തണൽ മരങ്ങൾ മുറിച്ച് നീക്കി: മാനേജ്മെൻ്റിനെതിരെ പ്രതിഷേധവുമായി വിദ്യാർത്ഥികൾ



കോഴിക്കോട്: സ്കൂൾ മുറ്റത്തെ തണൽമരങ്ങൾ മുറിച്ച മാനേജ്മെൻറിനെതിരെ പ്രതിഷേധവുമായി വിദ്യാർത്ഥികളും നാട്ടുകാരും. കോഴിക്കോട് പാലോറ ഹയർസെക്കൻഡറി സ്കൂളിനു മുന്നിലെ അഞ്ച് തണൽ മരങ്ങളാണ് ക്രിസ്മസ് അവധിക്കിടെ മുറിച്ചു മാറ്റിയത്. 

സംസ്ഥാന സ്കൂൾ കലോൽസവത്തിൻറെ ആരവങ്ങൾക്ക് നടുവിലാണ് കോഴിക്കോട്. എന്നാൽ നഗരത്തിൽ നിന്ന് 20 കിലോമീറ്റർ അകലെ ഉളളിയേരിക്കടുത്ത പാലോറയിൽ ഒരു വിദ്യാലയമൊന്നാകെ തീവ്ര ദുഖത്തിൻറെ നടുവിലാണ്. പതിറ്റാണ്ടുകളായി സ്കൂളിന് മുന്നിൽ തണൽവിരിച്ചു നിന്ന, ഒരു നാടിൻറെയാകെ കളിചിരികൾക്കും ആഘോഷങ്ങൾക്കും ഊർജ്ജം പകർന്ന തണൽ മരങ്ങളാണ് ഇനി ഓർമ മാത്രം.

മരങ്ങളുടെ വേരുകൾ സ്കൂൾ കെട്ടിടത്തിന് ബലക്ഷയമുണ്ടാക്കുമെന്ന പേരു പറഞ്ഞ് മരങ്ങൾ മുറിച്ചു നീക്കാൻ മാനേജ്മെൻറിലെ ഒരു വിഭാഗം ശ്രമം തുടങ്ങിയിട്ട് ഏറെ നാളായി.എന്നാൽ പ്രിൻസിപ്പലിൻറെയും മാനേ‍ജ്മെൻറ് കമ്മിറ്റിയിലെ ഒരു വിഭാഗത്തിൻറെയും കടുത്ത എതിർപ്പ് തടസമായി. തക്കം പാക്കിർത്തിരുന്ന മാനേജരും സംഘവും ക്രിസ്മസ് അവധിക്കാലത്താണ് തീരുമാനം നടപ്പാക്കിയത്. ഇക്കഴിഞ്ഞ 31ന് അർദ്ധരാത്രി മാവ് അടക്കമുളള അഞ്ച് മരങ്ങളും മുറിച്ച് നീക്കി.