പാലക്കാട് വീട് പൊളിക്കുന്നതിനിടെ ചുവരിടിഞ്ഞ് വീണ് രണ്ട് മരണം
പാലക്കാട് കൊഴിഞ്ഞാമ്പാറയില്‍ പഴയ വീട് പൊളിക്കുന്നതിനിടെ ചുവരിടിഞ്ഞുണ്ടായ അപകടത്തില്‍ രണ്ട് യുവാക്കള്‍ മരിച്ചു. ഇന്ന് ഉച്ചയ്ക്ക് മൂന്നരയോടെ കൊഴിഞ്ഞാമ്പാറ ഗവ. ആശുപത്രിക്ക് സമീപമാണ് സംഭവം. പൊല്‍പ്പുള്ളി വേര്‍കോലി എന്‍.വിനില്‍ (32) പെരുവമ്പ് വെള്ളപ്പന സി. വിനു (36) എന്നിവരാണ് മരിച്ചത്.
കൊഴിഞ്ഞാമ്പാറ ഗവ ആശുപത്രിക്ക് സമീപമുള്ള പഴയവീട് പൊളിക്കുന്നതിനിടയിലായിരുന്നു അപകടം. വീട് പൊളിക്കുന്നതിനിടെ ഒരു ഭാഗത്തെ ചുമരിടിഞ്ഞ് വീഴുകയായിരുന്നു. വീടിെന്‍റ സ്ലേബ് ഇടിഞ്ഞുവീഴുകയായിരുന്നുവെന്ന് പ്രദേശവാസികള്‍ പറയുന്നു.
ഇവര്‍ ഇന്നാണ് ഇവിടെ പണിക്കെത്തിയത്. മൂന്നുപേര്‍ പുറത്തും രണ്ടുപേര്‍ വീടിനുള്ളിലുമായിരുന്നു ജോലിചെയ്തിരുന്നത്. ഇതില്‍ വീടിനുള്ളിലുള്ള രണ്ടുപേരാണ് അപകടത്തില്‍ പെട്ടത്. മറ്റു തൊഴിലാളികള്‍ ശബ്ദം കേട്ട് ഓടിയെത്തിയെങ്കിലും ഇരുവരും പുറത്തെടുക്കുന്നതിന് മുമ്പ് തന്നെ മരിച്ചിരുന്നു. ഇവരുടെ മൃതദേഹം ജില്ലാ ആശുപത്രിയില്‍ സൂക്ഷിച്ചിരിക്കുകയാണ്. മൃതദേഹം പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കും
