മുംബൈ: ഭര്‍ത്താവ് കാമുകിയെ തേടി യുക്രൈനിലേക്ക് പോയെന്ന വിവരം അറിഞ്ഞ ഭാര്യ ആത്മഹത്യ ചെയ്തു. മുംബൈ കല്യാണില്‍ താമസിക്കുന്ന 25 കാരി കാജള്‍ ആണ് വീടിനുളളില്‍ തൂങ്ങി മരിച്ചത്. കാജളിന്റെ മരണവിവരം അറിഞ്ഞ് തിരികെ മുംെൈബയിലെത്തിയ ഭര്‍ത്താവ് നിതീഷ് നായരെ (26) പോലീസ് അറസ്റ്റ് ചെയ്തു. ആത്മഹത്യ പ്രേരണകുറ്റം ചുമത്തിയാണ് ഇയാളെ അറസ്റ്റ് ചെയ്തിരിക്കുന്നത്.
കഴിഞ്ഞ സെപ്റ്റംബര്‍ മാസത്തിലാണ് നിതീഷ് വിദേശ വനിതയുമായി ബന്ധമുളള വിവരം കാജള്‍ അറിയുന്നത്. യുക്രൈനില്‍ ജോലി ചെയ്യുന്ന സമയത്ത് യുവതിയുമായി ബന്ധമുണ്ടായിരുന്നുവെന്നാണ് കാജലിന്റെ കുടുംബം ആരോപിക്കുന്നത്. ഇരുവരും തമ്മിലുളള ഫോട്ടോയും വീഡിയോയും മൊബൈല്‍ ഫോണില്‍ കണ്ടതോടെയാണ് ബന്ധത്തെക്കുറിച്ച് പുറത്തറിയുന്നത്.
ഇക്കഴിഞ്ഞ ദിവസമാണ് പ്രമുഖ ഷിപ്പിംഗ് കമ്പനിയിലെ ജീവനക്കാരനായ നിതീഷ് നായര്‍ യുക്രൈനിലെ കാമുകിയുടെ അടുത്തേക്ക് പോയത്. യുക്രൈനിലെത്തിയ ശേഷം തിരികെ നാട്ടിലേക്ക് വരില്ലെന്ന് ഭാര്യയ്ക്ക് ഇയാള്‍ മെസേജയക്കുകയും ചെയ്തു. ഇക്കാ്യം കാജള്‍ മാതാവിനോട് പറഞ്ഞശേഷമാണ് വീടിനുളളില്‍ തൂങ്ങിമരിച്ചത്. ആത്മഹത്യ ചെയ്യാന്‍ പോകുന്നുവെന്ന് സൂചിപ്പിച്ച് അടുത്ത സുഹൃത്തുക്കള്‍ക്കും കാജള്‍ സന്ദേശം അയച്ചിരുന്നു.
നിതീഷ് ഉപേക്ഷിച്ച് പോയതിന്റെ മനോവിഷമത്തിലാണ് മകള്‍ ജീവനൊടുക്കിയതെന്ന് ചൂണ്ടിക്കാണിച്ചാണ് യുവതിയുടെ കുടുംബം പോലീസില്‍ പരാതി നല്‍കിയിരിക്കുന്നത്. നിതീഷ് അയച്ച സന്ദേശങ്ങളും വിദേശവനിതയുമായുളള ബന്ധത്തെ കുറിച്ചും പരാതിയില്‍ പറയുന്നുണ്ട്. തുടര്‍ന്നാണ് തിരികെ മുംബൈയിലെത്തിയ നിതീഷ് നായരെ പോലീസ് വീട്ടില്‍ നിന്ന് അറസ്റ്റ് ചെയ്തത്.
