മധ്യവയസ്കൻ കുഴഞ്ഞുവീണ് മരിച്ച സംഭവം : അയൽവാസി അറസ്റ്റിൽ
പുൽപ്പള്ളി : മധ്യവയസ്കൻ വീട്ടിൽ കുഴഞ്ഞു വീണ് മരിച്ച സംഭവത്തിൽ യുവാവ് അറസ്റ്റിൽ. മാരപ്പന്മൂല അയ്യനംപറമ്പിൽ ജോൺ (56) മരിച്ച സംഭവത്തിൽ അയൽവാസിയായ വെള്ളിലാം തൊടുകയിൽ ലിജോ എബ്രഹാമാണ് (42) അറസ്റ്റിലായത്.
ഞായറാഴ്ച വൈകുന്നേരം പോക്കിരിമുക്ക് കവലയിൽ നാട്ടുകാരുടെ മുന്നിൽവെച്ച് ലിജോ, ജോണിനെ മർദിച്ചിരുന്നു. സംഭവശേഷം വീട്ടിൽ തിരിച്ചെത്തിയ ജോൺ രാത്രിയോടെ കുഴഞ്ഞു വീണ് മരിക്കുകയായിരുന്നു.
ജോണിന്റെ മരണത്തെത്തുടർന്ന് നാട്ടു കാർ വലിയ പ്രതിഷേധമുയർത്തിയതോടെ ലിജോയെ രാത്രിതന്നെ പുല്പള്ളി പോലീസ് കസ്റ്റഡിയിലെടുത്തിരുന്നു. ജോണിന്റെ നെഞ്ചിൽ മർദനമേറ്റതിന്റെ പാടുകളുണ്ട്.
ഹൃദയാഘാതംമൂലമാണ് ജോൺ മരിച്ചതെന്നും മർദനമേറ്റതിലുള്ള മാനസികവിഷമവും ഇതിന് കാരണമായിട്ടുണ്ടാവാമെന്നുമാണ് പോസ്റ്റ്മോർട്ടം റിപ്പോർട്ടിലുള്ളത്. തിങ്കളാഴ്ച വൈകുന്നേരത്തോടെ യാണ് ലിജോയെ കേസിൽ പ്രതിചേർത്ത്, അറസ്റ്റ് രേഖപ്പെടുത്തിയത്. മനഃപൂർവമല്ലാത്ത നരഹത്യയാണ് കുറ്റം ചുമത്തിയിട്ടുള്ളത്.
റീജയാണ് ജോണിൻ്റെ ഭാര്യ. മക്കൾ: സച്ചിൻ ജോൺ (അയർലൻഡ്), ഷെബിൻ ജോൺ, ഷാരോൺ ജോൺ. സംസ്കാരം ചൊവ്വാഴ്ച ഉച്ചയ്ക്ക് രണ്ടിന് മരകാവ് സെയ്ൻ്റ് തോമസ് പള്ളി സെമിത്തേരിയിൽ.
