എല്‍പി സ്‌കൂള്‍ ടീച്ചര്‍ (എന്‍സിഎ എസ്ടി ഒണ്‍ലി) പരീക്ഷയില്‍ ഒന്നാം റാങ്ക് നേടിയ സി.ജി.ഗോപികയ്ക്ക് പാലയിലെ പൗരാവലിയുടെ അനുമോദനം
ഇരിട്ടി: എല്‍പി സ്‌കൂള്‍ ടീച്ചര്‍ (എന്‍സിഎ എസ്ടി ഒണ്‍ലി) പരീക്ഷയില്‍ ഒന്നാം റാങ്ക് നേടിയ
സി.ജി.ഗോപികയ്ക്ക് പാലയിലെ പൗരാവലിയുടെ നേതൃത്വത്തില്‍ അനുമോദനം നല്‍കി. നിരവധി പ്രതിസന്ധികളെ മറികടന്നാണ് ഗോപിക അഭിമാനാര്‍ഹമായ വിജയം കരസ്ഥമാക്കിയത്. എഴുതിയ പരീക്ഷകളില്‍ എല്ലാം ലിസ്റ്റില്‍ ഇടം നേടുന്നു എന്ന പ്രത്യേകതയും ഗോപികയ്ക്ക് ഉണ്ട്. ഇതിനകം 13 ഷോര്‍ട്ട് ലിസ്റ്റുകളിലും രണ്ട് മെയിന്‍ ലിസ്റ്റിലും ഗോപിക ഉള്‍പ്പെട്ടിട്ടുണ്ട്
എല്‍ഡി ക്ലാര്‍ക്ക്, ബീറ്റ് ഫോറസ്റ്റ് ഓഫീസര്‍, വുമണ്‍ ഫയര്‍ ആന്‍ഡ് റസ്‌ക്യൂ ഓഫീസര്‍, ഖാദിബോര്‍ഡ് ക്ലര്‍ക്ക്, യൂണിവേഴ്‌സിറ്റി ലാസ്റ്റ് ഗ്രേഡ് തുടങ്ങിയ പിഎസ്സി ലിസ്റ്റുകളില്‍ എല്ലാം ഗോപിക ഉള്‍പ്പെട്ടിട്ടുണ്ട്. 2024 ജൂലൈയില്‍ നടന്ന എല്‍പി സ്‌കൂള്‍ ടീച്ചര്‍ പിഎസ്സി പരീക്ഷയില്‍ ആണ് ഗോപിക ഒന്നാം റാങ്ക് നേടിയത്. പാല ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ നടപ്പാക്കിയ ഉണര്‍വ് നവ ജീവിത പരിശീലന പരിപാടിയിലെ അംഗമായിരുന്ന ഗോപിക എസ്എസ്എല്‍സിയും പ്ലസ്ടുവും ഡിഎല്‍എഡും കെ ടെറ്റും ബിഎസ്‌സി ബോട്ടണിയും എല്ലാം മികച്ച മാര്‍ക്കോടെയാണ് പാസായത്.
ആറളം ഫാം പുനരധിവാസ മേഖലയില്‍ ഭൂമി ലഭ്യമായതോടെ അച്ഛനും അമ്മയും അവിടെ താമസിച്ചപ്പോഴും പാലയിലെ ബന്ധുവീട്ടില്‍ നിന്നാണ് ഗോപിക പഠിച്ചത്.
അനുമോദന സംഗമം സണ്ണി ജോസഫ് എംഎല്‍എ ഉദ്ഘാടനം ചെയ്തു. മുഴക്കുന്ന് പഞ്ചായത്ത് പ്രസിഡഡന്റ് ടി.ബിന്ദു അധ്യക്ഷത വഹിച്ചു. സംഘാടക സമിതി ചെയര്‍മാന്‍ കെ.ടി.ടോമി, കണ്‍വീനര്‍ സി.എ.അബ്ദുള്‍ ഗഫൂര്‍, മുഴക്കുന്ന് പഞ്ചായത്ത് അംഗങ്ങളായ
എ.സി.അനീഷ്, കെ.മോഹനന്‍, ധന്യ രാകേഷ്, ഹൃദയാരാം ട്രെയിനര്‍മാരായ പ്രദീപന്‍ മാലോത്ത്, വ.ിവി.റിനേഷ്, ഭാരത് ആര്‍ട്‌സ് പ്രസിഡന്റ് വി.വി.രവീന്ദ്രന്‍, ഗ്രാമദീപം പ്രസിഡന്റ് ടി.വി.രാജഗോപാലന്‍, തണല്‍ പ്രസിഡന്റ് കെ.അശോകന്‍, ഉണര്‍വ് പ്രതിനിധി എം.ശില്പ, ട്രഷറര്‍ കെ.പി.നമേഷ് എന്നിവര്‍ പ്രസംഗിച്ചു. കണ്ണൂര്‍ വായ്ത്താരി നാട്ടറിവ് നാടന്‍ കലാവേദിയുടെ നാടന്‍പാട്ടരങ്ങും നടന്നു
