ഇറാനെതിരായ ആക്രമണം അവസാനിപ്പിക്കാൻ യുഎൻ ഇടപെടണം, ഇസ്രയേലിനെതിരെ ഇന്ത്യ പ്രതിഷേധിക്കണം; മലയാളികൾ നോർക്കയിൽ രജിസ്റ്റർ ചെയ്യണമെന്നും മുഖ്യമന്ത്രി
അതേസമയം ഇറാനെതിരെയുള്ള യു എസ് പ്രസിഡന്റ് ഡോണൾഡ് ട്രംപിന്റെ അക്രമോത്സുകമായ പ്രസ്താവനകളെ ശക്തമായി അപലപിച്ച് സി പി എം പൊളിറ്റ് ബ്യൂറോ നേരത്തെ രംഗത്തെത്തിയിരുന്നു. ഇത്തരം വാചാടോപങ്ങൾ സംഘർഷങ്ങൾ കൂടുതൽ വർദ്ധിപ്പിക്കുകയും പശ്ചിമേഷ്യൻ മേഖലയെ മുഴുവൻ യുദ്ധത്തിലേക്കും അസ്ഥിരതയിലേക്കും തള്ളിവിടുകയും ചെയ്യുമെന്ന് സി പി എം പൊളിറ്റ് ബ്യൂറോ പ്രസ്താവനയിലൂടെ പറഞ്ഞു. പ്രസിഡന്റ് ട്രംപ് ഇപ്പോൾ ഇറാനിയൻ നേതാക്കളെ വധിക്കുമെന്ന് പരസ്യമായി ഭീഷണിപ്പെടുത്തുകയും ഇറാന്റെ നിരുപാധികമായ കീഴടങ്ങൽ ആവശ്യപ്പെടുകയും ചെയ്യുന്നത് വളരെ നിന്ദ്യമാണ്. പശ്ചിമേഷ്യയിൽ യു എസ് സൈനിക കപ്പലുകളുടെ വലിയ തോതിലുള്ള സമാഹരണം ഇറാനെതിരെ ആക്രമണം നടത്താൻ ഇസ്രായേലിനൊപ്പം ചേരാനുള്ള അമേരിക്കയുടെ സന്നദ്ധതയെ കൂടുതൽ വ്യക്തമാക്കുന്നു. ഈ സംഭവവികാസങ്ങൾ അപകടകരമാണ്, മേഖലയെയും ലോകത്തെയാകെയും വിനാശകരമായ ഒരു യുദ്ധത്തിന്റെ വക്കിലേക്ക് ഇത് തള്ളിവിടാമെന്നും സി പി എം ചൂണ്ടികാട്ടി.
കാനഡയിൽ നടന്ന ജി 7 യോഗത്തിൽ നിന്നുള്ള പ്രസ്താവന ഈ അക്രമോത്സുകതയ്ക്ക് ആക്കം കൂട്ടുന്നു. ഇസ്രായേലിന്റെ ആക്രമണത്തിനു നേരെ കണ്ണടയ്ക്കുന്ന ജി 7 ഇറാനെ കുറ്റപ്പെടുത്തുന്നത് അപലപനീയമാണ്. പശ്ചിമേഷ്യയിൽ വർദ്ധിച്ചുവരുന്ന സംഘർഷങ്ങൾക്കും തുടർച്ചയായ അസ്ഥിരതയ്ക്കും ഇസ്രായേലാണ് പ്രാഥമിക ഉത്തരവാദിത്തം എന്ന് വ്യക്തമാണ്. ഗാസയിലെ വംശഹത്യയോടെ ഇസ്രായേൽ ആരംഭിച്ച ആക്രമണങ്ങൾ സിറിയ, ലെബനൻ, യെമൻ, ഇപ്പോൾ ഇറാൻ എന്നിവയുൾപ്പെടെ മേഖലയിലെ മറ്റ് രാജ്യങ്ങളിലേക്കും സൈനിക നടപടികൾ വ്യാപിപ്പിച്ചിട്ടുണ്ട്. ഇസ്രായേലിനെ നിയന്ത്രിക്കാതെ, മേഖലയിലെ സമാധാനവും സ്ഥിരതയും അകലെ ത്തന്നെ ആയിരിക്കുമെന്നും സി പി എം ഓർമ്മിപ്പിച്ചു.
അന്താരാഷ്ട്ര നിയമങ്ങളുടെയും കൺവെൻഷനുകളുടെയും നഗ്നമായ ലംഘനത്തിലൂടെ, പശ്ചിമേഷ്യയിലും അതിനപ്പുറത്തും തങ്ങളുടെ ആധിപത്യം സ്ഥാപിക്കാൻ യു എസും പാശ്ചാത്യ സാമ്രാജ്യത്വവും ഒരു തെമ്മാടി രാഷ്ട്രമായ ഇസ്രായേലിനെ ഉപയോഗിക്കുന്നു. അമേരിക്കയും ഇസ്രായേലും അവരുടെ ആക്രമണാത്മക പ്രവർത്തനങ്ങൾ അവസാനിപ്പിച്ച് നയതന്ത്രത്തിലേക്ക് മടങ്ങാൻ സമ്മർദ്ദം ചെലുത്താൻ അന്താരാഷ്ട്ര സമൂഹം അടിയന്തിരമായി പ്രവർത്തിക്കണം. ബി ജെ പി നേതൃത്വത്തിലുള്ള ഇന്ത്യൻ സർക്കാർ അതിന്റെ യു എസ് അനുകൂല, ഇസ്രായേൽ അനുകൂല വിദേശനയ നിലപാട് ഉപേക്ഷിക്കണം. ദക്ഷിണഗോളത്തോടുള്ള യഥാർത്ഥ പ്രതിബദ്ധതയ്ക്ക്, ഇസ്രായേലിന്റെയും അതിന്റെ പ്രധാന പിന്തുണക്കാരനായ അമേരിക്കയുടെയും ആക്രമണം ഉടനടി അവസാനിപ്പിക്കണമെന്ന് കൂട്ടായി ആവശ്യപ്പെടാൻ മറ്റ് രാജ്യങ്ങളുമായുള്ള ഐക്യദാർഢ്യം ആവശ്യമാണെന്നും സി പി എം പൊളിറ്റ് ബ്യൂറോ പ്രസ്താവനയിൽ ചൂണ്ടിക്കാട്ടി.
