ഇറാനിലെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (ഐആർജിസി) ഇന്റലിജൻസ് മേധാവി ബ്രിഗേഡിയർ ജനറൽ മുഹമ്മദ് കസെമിയും ഡെപ്യൂട്ടി ജനറൽ ഹസ്സൻ മൊഹാകിഖും ടെഹ്‌റാനിൽ ഇസ്രായേൽ നടത്തിയ വ്യോമാക്രമണത്തിൽ കൊല്ലപ്പെട്ടു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ഫോക്സ് ന്യൂസിന് നൽകിയ അഭിമുഖത്തിൽ ആണ് ഇക്കാര്യം പറഞ്ഞത്. ‘കുറച്ചു മുൻപ്, അവരുടെ ചീഫ് ഇന്റലിജൻസ് ഓഫീസറെയും ഡെപ്യൂട്ടിയെയും ടെഹ്‌റാനിൽ എത്തിച്ചതായി എനിക്ക് നിങ്ങളോട് പറയാൻ കഴിയും.’
‘മൂന്ന് ഇന്റലിജൻസ് ജനറൽമാരായ മുഹമ്മദ് കസേമി, ഹസ്സൻ മൊഹാഗെഗ്, മൊഹ്‌സെൻ ബാഗേരി എന്നിവരെ വധിക്കുകയും രക്തസാക്ഷികളായി വീഴ്‌ത്തുകയും ചെയ്തു’ എന്ന റെവല്യൂഷണറി ഗാർഡിന്റെ പ്രസ്താവന ഉദ്ധരിച്ച് ഇറാനിയൻ ഔദ്യോഗിക വാർത്താ ഏജൻസിയായ ഐആർഎൻഎയും ഇത് സ്ഥിരീകരിച്ചു. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (ഐആർജിസി) ഇന്റലിജൻസ് മേധാവി മുഹമ്മദ് കസേമി, ഇസ്രായേൽ നടത്തിയ ഏറ്റവും പുതിയ ആക്രമണത്തിൽ കൊല്ലപ്പെട്ടതായി ടെഹ്‌റാൻ ടൈംസ് റിപ്പോർട്ട് ചെയ്തു. കസേമിയുടെ ഡെപ്യൂട്ടി ഹസ്സൻ മൊഹാഗെഗ്, മറ്റൊരു മുതിർന്ന ഐആർജിസി കമാൻഡറായ മൊഹ്‌സെൻ ബഖേരി എന്നിവരും ആക്രമണത്തിൽ കൊല്ലപ്പെട്ടതായി റിപ്പോർട്ടിൽ പറയുന്നു.
വെള്ളിയാഴ്ച മുതൽ കുറഞ്ഞത് 14 ഇറാനിയൻ ആണവ ശാസ്ത്രജ്ഞരെങ്കിലും ആക്രമണങ്ങളിൽ കൊല്ലപ്പെട്ടതായും ഇസ്രായേൽ അവകാശപ്പെട്ടു. ഇറാന്റെ ആണവ പദ്ധതിയിൽ പ്രവർത്തിച്ചവരും ഇസ്രായേലിന്റെ ആക്രമണങ്ങളിൽ കൊല്ലപ്പെട്ടവരുമായ ഒമ്പത് ശാസ്ത്രജ്ഞരുടെ പട്ടിക ഇസ്രായേൽ പ്രതിരോധ സേന (IDF) പുറത്തുവിട്ടു.
അബ്ദുൽ ഹമീദ് മിനുഷെർ (റിയാക്ടർ ഭൗതികശാസ്ത്രത്തിൽ വിദഗ്‌ദ്ധൻ), അഹമ്മദ് റെസ സോൾഫാഘരി ദര്യാനി (ന്യൂക്ലിയർ എഞ്ചിനീയറിംഗിൽ വിദഗ്‌ദ്ധൻ), അക്ബർ മൊട്ടലെബി സാദ് (കെമിക്കൽ എഞ്ചിനീയറിംഗിൽ വിദഗ്‌ദ്ധൻ), അലി ബഹുയി കതിരിമി (മെക്കാനിക്സിൽ വിദഗ്‌ദ്ധൻ), അമീർ ഹസ്സൻ ഫഖാഹി (ഭൗതികശാസ്ത്രത്തിൽ വിദഗ്‌ദ്ധൻ), ഫെറെയ്‌ദൂൺ അബ്ബാസി (ന്യൂക്ലിയർ എഞ്ചിനീയറിംഗിൽ വിദഗ്‌ദ്ധൻ), മൻസൂർ അസ്ഗരി (ഭൗതികശാസ്ത്രത്തിൽ വിദഗ്‌ദ്ധൻ), മുഹമ്മദ് മെഹ്ദി ടെഹ്‌റാൻചി (ഭൗതികശാസ്ത്രത്തിൽ വിദഗ്‌ദ്ധൻ), സെയ്ദ് ബർജി (മെറ്റീരിയൽ സയൻസിൽ വിദഗ്‌ദ്ധൻ) എന്നിവരാണ് കൊല്ലപ്പെട്ട വിദഗ്ധരിൽ ഉൾപ്പെടുന്നത്.
