ആയുർവേദത്തിന്റെ അനന്ത സാധ്യതകളുമായി അന്താരാഷ്ട്ര ഗവേഷണ കേന്ദ്രം യാഥാർഥ്യമാകുന്നു
ഇരിട്ടി: പടിയൂർ കല്ല്യാട് പഞ്ചായത്തിലെ കല്യാട് നിർമാണത്തിനുള്ള അന്താരാഷ്‌ട ആയുർവേദ ഗവേഷണ കേന്ദ്രം ആദ്യഘട്ടം നവംബറിൽ ഉദ്ഘാടനം ചെയ്യും.
ഒക്ടോബറിനുള്ളിൽ എല്ലാ ഒന്നാംഘട്ട പ്രവർത്തനങ്ങളും പൂർത്തിയാക്കാനും ഇപ്പോൾ തീരുമാനമായി. ഒന്നാംഘട്ടത്തിൽ 100 കിടക്കകളുള്ള ആധുനിക സൗകര്യങ്ങളോടുകൂടിയ ആശുപത്രി ബ്ലോക്കും വൈദ്യശാസ്ത്ര അറിവുകളുമായി ബന്ധപ്പെട്ട താളിയോലകളും കയ്‌ഴുത്ത് കൃതികളും സംരക്ഷിക്കുന്നതിനുള്ള മാനുസ്ക്രിപ്റ്റ് സെന്റർ, ഔഷധ സസ്യങ്ങളുടെ നേഴ്‌സറി ബ്ലോക്ക്, ചുറ്റുമതിൽ, പ്രവേശന കവാടം എന്നിവയാണ് പൂർത്തിയാക്കുന്നത്.
ഇതോടൊപ്പം അന്താരാഷ്‌ട നിലവാരമുള്ള ലാബും സജ്ജമാക്കും. ആശുപത്രി ബ്ലോക്കിന്റെ മൂന്ന് നിലകളുടെ നിർമാണം അവസാനഘട്ടത്തിലാണ്. മാനുസ്ക്രിപ്റ്റ് ഡി സെന്റർ നിർമാണവും പുരോഗമിക്കുന്നു. 36.5 ഏക്കറിൽ കിഫ്ബി അനുവദിച്ച ഫണ്ടിൽ നിന്നും 120 കോടിയോളം ഉപയോഗിച്ചാണ് ഒന്നാംഘട്ടം പൂർത്തിയാക്കുന്നത്. 250 ഏക്കർ സ്ഥലമാണ് ആയുർവേദ ഗവേഷണ കേന്ദ്രത്തിനായി ഏറ്റെടുത്തിരിക്കുന്നത്. അടുത്ത രണ്ട്, മൂന്ന് ഘട്ടങ്ങളിൽ ഗവേഷണ കേന്ദ്രത്തിന്റെ നിർമാണം പൂർത്തിയാകുന്ന മുറയ്ക്ക് ആയിരത്തിലധകം തസ്‌തികകൾ വേണ്ടി വരുമെന്നാണ് പ്രതീക്ഷിക്കുന്നത്.
ആയുർവേദവുമായി ബന്ധപ്പെട്ട ഇരുന്നൂറോളം താളിയോല ഗ്രന്ഥങ്ങളും രണ്ടായിരത്തോളം കയെഴുത്ത് പ്രതികളും ലഭിച്ചതായും ഒന്നാംഘട്ടം പൂർത്തിയാവുന്നതോടെ ഇതൊക്കെ ഡിജിറ്റലൈസ് ചെയ്യും. രണ്ടാംഘട്ടത്തിൽ അന്താരാഷ്ട്ര ആയുർവേദ മ്യൂസിയം, അഡ്മിനിസ്ട്രേറ്റീവ് ബ്ലോക്ക്, ശാസ്ത്രജ്‌ഞന്മാർക്കും വിദ്യാർഥികൾക്കും ഉള്ള താമസസൗകര്യം ഹെർബൽ ഗാർഡൻ, ആയുർവേദവുമായി ബന്ധപ്പെടുത്തിയുള്ള ടൂറിസം സാധ്യതകൾ എന്നിവ പൂർത്തിയാക്കും. ഇതിനുള്ള പ്രവർത്തനങ്ങളും ആരംഭിച്ചു. വിദേശത്തുനിന്നും സ്വദേശത്തു് നിന്നും ആയുർവേദ ഗവേഷണവുമായി ബന്ധപ്പെട്ട എല്ലാ കാര്യങ്ങളും ശാസ്ത്രീയമായി അപഗ്രഥിക്കുന്നതിനുള്ള കേന്ദ്രമായി വളർത്തും.
