മെസ്സിയെ കേരളത്തില് എത്തിക്കാമെന്ന് കാണിച്ച് തട്ടിപ്പ്; കായിക വകുപ്പ് റിപ്പോര്ട്ടില് തുടരന്വേഷണത്തിന് സര്ക്കാര്
അര്ജന്റീന ഫുട്ബോള് അസോസിയേഷന് (എഎഫ്എ) 1.5 കോടി യുഎസ് ഡോളര് (ഏകദേശം 126 കോടി രൂപ) നല്കിയതായി സ്പോണ്സര് അവകാശപ്പെട്ടിരുന്നു. എന്നാല് പണം കൈമാറിയതിന്റെയോ എഎഫ്എ അത് സ്വീകരിച്ചതിന്റെയോ യാതൊരു രേഖകളും സര്ക്കാരിന് ലഭിച്ചിട്ടില്ല. എഎഫ്എയും സംസ്ഥാന സര്ക്കാരും തമ്മിലുള്ള കരാറിന്റെ രേഖയോ സ്പോണ്സറും സര്ക്കാരും തമ്മില് ഒപ്പിട്ടതിന്റെ രേഖകളോ കണ്ടെത്താനായിട്ടില്ല. കായികവകുപ്പ് സ്പെഷ്യല് സെക്രട്ടറി എന്. പ്രശാന്ത് തയ്യാറാക്കിയ റിപ്പോര്ട്ട് രണ്ടാഴ്ച മുന്പ് തുടര് നടപടികള്ക്കായി മുഖ്യമന്ത്രി വിഡി സതീശന് കൈമാറി.
അതിനിടെ മെസിയുടെ പേരിലെ തട്ടിപ്പിൽ കൂടുതൽ വിവരങ്ങൾ പുറത്ത് വന്നു. അർജന്റീന ഫുട്ബോൾ അസോസിയേഷനുമായി ആശയവിനിമയം നടത്തിയത് കായിക വകുപ്പ് അല്ലെന്നും വി അബ്ദുറഹിമാൻ നേരിട്ടെന്നും രേഖകളാണ് ഇപ്പോൾ പുറത്തുവന്നിരിക്കുന്നത്. മുൻ മന്ത്രിയുടെ ഇ മെയിൽ പുറത്ത് വന്നു. കായിക സെക്രട്ടറിയോ ഡയറക്ടറോ കളത്തിൽ ഇല്ല. കോപ്പി അയച്ചിരിക്കുന്നത് സ്പോൺസർക്കും എഎഫ്എ ഭാരവാഹികൾക്കും മാത്രമാണ്. കൂടാതെ ഇമെയിലിന്റെ കോപ്പി സ്വകാര്യവ്യക്തിക്കും പോയിട്ടുണ്ട്. മലപ്പുറം സ്വദേശിയായ അമീറ ഐഷ ബീഗത്തിനാണ് കോപ്പി അയച്ചിരിക്കുന്നത്. മന്ത്രിയുടെ സുഹൃത്താണ് മലപ്പുറം സ്വദേശി അമീറ. സംഭവം സംബന്ധിച്ച രേഖകള് ആദ്യമായിട്ടാണ് പുറത്ത് വരുന്നത്.
