കോട്ടയം: കുറുപ്പംപടിയില് ഭര്തൃവീട്ടില് യുവതിയെ മരിച്ച നിലയില് കണ്ടെത്തിയ സംഭവത്തില് ദുരൂഹതയുണ്ടെന്ന ആരോപണവുമായി ബന്ധുക്കള് രംഗത്തെത്തി. പെരുമ്പാവൂര് പനിച്ചയം ഓലിപ്പാറമോളില് ആര്യയെ (31) ആണ് കഴിഞ്ഞ ഓഗസ്റ്റ് 18-ന് രാവിലെ കോട്ടയം നാട്ടകം സ്വദേശിയായ ഭര്ത്താവ് ദീപക് ബാബുവിന്റെ വീട്ടിലെ കിടപ്പുമുറിയില് തൂങ്ങിമരിച്ച നിലയില് കണ്ടെത്തിയത്. സംഭവത്തില് സമഗ്രമായ അന്വേഷണം ആവശ്യപ്പെട്ട് യുവതിയുടെ വീട്ടുകാര് പോലീസില് പരാതി നല്കി.
ഭര്തൃമാതാവും മുത്തശ്ശിയും ചേര്ന്ന് ആര്യയെ നിരന്തരം മാനസികമായും ശാരീരികമായും ഉപദ്രവിച്ചിരുന്നതായി കുടുംബാംഗങ്ങള് ആരോപിക്കുന്നു. ഈ നിരന്തരമായ പീഡനമാണ് യുവതിയുടെ മരണത്തിലേക്ക് നയിച്ചതെന്നാണ് ബന്ധുക്കളുടെ പ്രധാന പരാതി. മരണപ്പെടുന്നതിന് തൊട്ടുമുന്പുള്ള ദിവസം ഓണക്കോടി വാങ്ങുന്നതുമായി ബന്ധപ്പെട്ട് ഭര്തൃവീട്ടില് രൂക്ഷമായ തര്ക്കങ്ങള് നടന്നിരുന്നതായി പറയപ്പെടുന്നു. ഈ സംഭവത്തിന് തൊട്ടുപിന്നാലെയാണ് ആര്യയെ കിടപ്പുമുറിയില് മരിച്ച നിലയില് കണ്ടെത്തിയത്.
പൊലീസിന്റെ ഭാഗത്തുനിന്ന് കൃത്യമായ അന്വേഷണം ഉണ്ടാകണമെന്ന് ആവശ്യപ്പെടുന്ന കുടുംബം, പെരുമ്പാവൂര് ഡിവൈഎസ്പിക്ക് നേരിട്ട് പരാതി നല്കാനുള്ള ഒരുക്കത്തിലാണ്. മരിച്ച ആര്യക്ക് അമര്നാഥ് എന്നൊരു മകനുണ്ട്. സംഭവത്തില് കൂടുതല് അന്വേഷണം ആവശ്യപ്പെടുന്നതിനിടെ യുവതിയുടെ സംസ്കാര ചടങ്ങുകള് പൂര്ത്തിയാക്കി.
