കഠ്മണ്ഡു: പ്രളയം സർവ്വതും തകർത്ത നേപ്പാളിൽ അതിജീവനത്തിന്റെയും പ്രതീക്ഷയുടെയും പ്രതീകമായി മാറിയിരിക്കുകയാണ് തൊണ്ണൂറ്റിയേഴുകാരിയായ ഗുണ മായ ബൊഹാറ. മണ്ണുമാന്തി യന്ത്രത്തിന്റെ കോരികയ്ക്കുള്ളിൽ ഇരിക്കുന്ന ഗുണയുടെ ചിത്രങ്ങൾ ഇതിനകം തന്നെ ലോകത്താകമാനം ശ്രദ്ധിക്കപ്പെട്ടു കഴിഞ്ഞു. ചെളി പുരണ്ട വസ്ത്രങ്ങളും സർവ്വവും നഷ്ടപ്പെട്ട് ക്ഷീണിച്ച മുഖഭാവവും നേപ്പാളിലുണ്ടായ പ്രളയ ദുരന്തത്തിന്റെ ഭീകരതയാണ് വ്യക്തമാക്കുന്നത്. ഗുണ മായ ബൊഹാറ താമസിച്ചിരുന്ന കെയർ ഹോമും കനത്ത പ്രളയത്തിൽ പൂർണ്ണമായി തകർന്നിരുന്നു. തകർന്ന കെട്ടിടത്തിന്റെ അവശിഷ്ടങ്ങൾക്കിടയിൽ മണിക്കൂറുകളോളം കുടുങ്ങിക്കിടന്ന അവരെ, പോലീസും നേപ്പാൾ സൈന്യവും ചേർന്ന് നാലുമണിക്കൂർ നീണ്ട കഠിന പരിശ്രമത്തിനൊടുവിലാണ് പുറത്തെടുത്തത്.
മുത്തശ്ശിയെ രക്ഷപ്പെടുത്താനായി സഹോദരന്റെ പേരക്കുട്ടിയായ ദീപക് ബൊഹാറ കഠ്മണ്ഡുവിൽ നിന്നും ഇവിടേക്ക് എത്തിയിരുന്നു. ഗുണ ഒരു പോരാളിയാണെന്നാണ് ദീപക് ബിബിസി നേപ്പാളിയോട് പ്രതികരിച്ചത്. മുത്തശ്ശിയെ ജീവനോടെ തിരിച്ചുകിട്ടിയെങ്കിലും ഈ ദുരന്തത്തിൽ മറ്റ് ഒരുപാട് പേർക്ക് ജീവൻ നഷ്ടപ്പെട്ടുവെന്നും അദ്ദേഹം കൂട്ടിച്ചേർത്തു. നിലവിൽ ആശുപത്രിയിൽ ചികിത്സയിൽ കഴിയുന്ന ഗുണ മായയുടെ ആരോഗ്യനില മെച്ചപ്പെട്ടു വരികയാണ്. എങ്കിലും, താൻ എങ്ങനെയാണ് ഈ വലിയ ദുരന്തത്തെ അതിജീവിച്ചതെന്ന് വ്യക്തമായി പറയാനാവുന്ന സ്ഥിതിയിലല്ല അവർ ഇപ്പോഴുമുള്ളതെന്ന് നേപ്പാളി മാധ്യമങ്ങൾ റിപ്പോർട്ട് ചെയ്യുന്നു.
അതേസമയം, നേപ്പാളിലെ റാസുവ ജില്ലയിലുണ്ടായ പ്രളയത്തിൽ മരിച്ചവരുടെ എണ്ണം 600 കടന്നിരിക്കുകയാണ്. ഇതുവരെ 676 പേരുടെ മൃതദേഹങ്ങളാണ് കണ്ടെത്തിയത്. കൂടാതെ മൂവായിരത്തോളം പേരെ ഇനിയും കണ്ടെത്താനുണ്ട്. കാണാതായവരിൽ മുന്നൂറിലേറെ ഇന്ത്യക്കാരും ഉൾപ്പെടുന്നുണ്ടെന്നാണ് വിവരം. പ്രളയബാധിത മേഖലകളുടെ പുനരധിവാസത്തിനായി 400 മുതൽ 500 കോടി ഡോളർ വരെ ആവശ്യമായി വരുമെന്ന് നേപ്പാൾ ധനമന്ത്രി സ്വാർനിം വേഗിൾ വ്യക്തമാക്കി.
ഭയാനകമായ ആ ദുരന്ത നിമിഷങ്ങളെക്കുറിച്ചാണ് പ്രളയത്തെ അതിജീവിച്ചവർ വിവരിക്കുന്നത്. ഉയർന്ന പ്രദേശങ്ങളിലേക്ക് ആളുകൾ നടത്തിയ നെട്ടോട്ടവും, കൺമുന്നിൽ തകർന്നുവീണ വീടുകളും, കുത്തൊഴുക്കിൽപ്പെട്ട് പോയ മനുഷ്യരുമെല്ലാം അവർ കണ്ണീരോടെ ഓർത്തെടുക്കുന്നു. നേപ്പാൾ-തിബത്ത് അതിർത്തിയിലെ തിമുരെയിലെ കസ്റ്റംസ് ഏജന്റായ രാജു ബുധത്തോക്കിയെ അത്ഭുതകരമായി രക്ഷപ്പെട്ടിരുന്നു, ബുധനാഴ്ച രാവിലെ കുന്നിൻചെരിവ് പെട്ടെന്ന് കുലുങ്ങാൻ തുടങ്ങിയെന്നാണ് രാജു പറഞ്ഞത്.
മുറിയിൽ വിശ്രമിക്കുകയായിരുന്ന ബുധത്തോക്കി ആദ്യം കരുതിയത് ഭൂകമ്പം ഉണ്ടായതാണെന്നാണ്, 'ദി കാഠ്മണ്ഡു പോസ്റ്റ്' റിപ്പോർട്ട് ചെയ്യുന്നു. തുടർന്ന് അയാൾ പുറത്തേക്ക് ഓടി അടുത്തുള്ള ഒരു പൊലീസ് പോസ്റ്റിലേക്ക് എത്തിയെങ്കിലും, പൊലീസുകാരും ജീവനുവേണ്ടി അവിടെനിന്നും പലായനം ചെയ്യുകയാണെന്നാണ് കണ്ടത്. ഒരു കമ്പിവേലിക്ക് അരികിലൂടെ രക്ഷപ്പെടാൻ ശ്രമിക്കുന്നതിനിടയിൽ അയാളുടെ കൈക്ക് പരിക്കേൽക്കുകയും ചെയ്തു.
രക്ഷപ്പെടുന്നതിനിടയിൽ തിരിഞ്ഞുനോക്കിയപ്പോൾ തിമുരെ മാർക്കറ്റിലെ വീടുകൾ ഒന്നിനുപുറകെ ഒന്നായി വെള്ളപ്പൊപ്പത്തിൽ ഒലിച്ചുപോകുന്നതാണ് കണ്ടതെന്ന് ബുധത്തോക്കി പറയുന്നു. ചില വീടുകളാകട്ടെ ഏതാനും സെക്കൻഡുകൾക്കുള്ളിൽ നദിയിലേക്ക് പൂർണ്ണമായി അപ്രത്യക്ഷമായി. ഒടുവിൽ ബുധത്തോക്കി കുന്നിൻമുകളിലുള്ള ഏകദേശം 500 മീറ്റർ അകലെയുള്ള ഒരു കാട്ടിൽ എത്തിച്ചേരുകയും അവിടെ സുരക്ഷിതനാവുകയും ചെയ്തു.
"കാട്ടിൽ നിന്ന് താഴേക്ക് തിമുറെയിലേക്ക് നോക്കിയപ്പോൾ, എനിക്ക് ഇതുപോലെ ജീവിതത്തിൽ ഒരു രണ്ടാം അവസരം ലഭിക്കുമെന്ന് ഞാൻ ഒരിക്കലും കരുതിയിരുന്നില്ല," ത്രിശൂലിയിലെ ആശുപത്രി കിടക്കയിൽ കിടന്ന് അയാൾ പറഞ്ഞു. വ്യാഴാഴ്ച രാവിലെ 10 മണിയോടെ ആർമി ഹെലികോപ്റ്റർ എത്തിയാണ് ഇവരെ സുരക്ഷിതമായി ബിധൂരിലേക്ക് മാറ്റിയത്. "ഹെലികോപ്റ്ററിൽ കയറിയപ്പോഴാണ് ഞാൻ യഥാർത്ഥത്തിൽ ജീവനോടെയുണ്ടെന്ന് എനിക്ക് തോന്നിയത്," ഗൗതം എന്ന മറ്റൊരു അതിജീവിതൻ മാധ്യമങ്ങളോട് പ്രതികരിച്ചു.
ദോലഖയിലെ തുളസി ബഹാദൂർ ഭണ്ഡാരിയുടെ അനുഭവം ഇതിൽ നിന്നും തികച്ചും വ്യത്യസ്തമായിരുന്നു. 'ദി കാഠ്മണ്ഡു പോസ്റ്റ്' റിപ്പോർട്ട് അനുസരിച്ച്, കറുത്ത ചെളിയും വെള്ളപ്പൊപ്പവും ആ ജനവാസ മേഖലയിലൂടെ കുതിച്ചൊഴുകിയപ്പോൾ ഭണ്ഡാരി രക്ഷപ്പെടാൻ വേണ്ടി ഓടുകയായിരുന്നു. അയാൾ ജീവനുവേണ്ടി ഓടുമ്പോൾ തൊട്ടടുത്തുള്ള വീടുകൾ ഓരോന്നായി ഒന്നിനുപുറകെ ഒന്നായി തകർന്നു വീഴുകയായിരുന്നു. എങ്ങനെയൊക്കെയോ ആ മഹാദുരന്തത്തെ അതിജീവിക്കാൻ കഴിഞ്ഞതിന്റെ ആശ്വാസത്തിലാണ് ഈ മനുഷ്യരെല്ലാം ഇപ്പോൾ സുരക്ഷിത കേന്ദ്രങ്ങളിൽ കഴിയുന്നത്.
