ന്യൂഡൽഹി: പ്രതിപക്ഷ പ്രതിഷേധങ്ങൾക്കും രാഷ്ട്രീയ വാക്പോരുകൾക്കും ഒടുവിൽ പാർലമെന്റിന്റെ വർഷകാല സമ്മേളനം അനിശ്ചിതകാലത്തേക്ക് പിരിഞ്ഞു. സമ്മേളനത്തിന്റെ അവസാന ദിവസമായ വ്യാഴാഴ്ച ആഭ്യന്തര മന്ത്രി അമിത് ഷാ ലോക്സഭയിലെത്തിയെങ്കിലും പ്രതീക്ഷിച്ചിരുന്ന ചർച്ചകളിലോ വിശദീകരണങ്ങളിലോ അദ്ദേഹം പങ്കെടുത്തില്ല. പ്രധാനമന്ത്രി നരേന്ദ്ര മോദിയും പ്രതിരോധ മന്ത്രി രാജ്നാഥ് സിങ്ങും സഭയിലെത്തി. (Amit Shah Lok Sabha)
നീറ്റ് പരീക്ഷാ ക്രമക്കേടുകളുമായി ബന്ധപ്പെട്ട വിഷയങ്ങളിൽ ചർച്ചയ്ക്ക് സർക്കാർ തയ്യാറാണെന്നും പ്രതിപക്ഷത്തിന്റെ ചോദ്യങ്ങൾക്ക് മറുപടി നൽകുമെന്നും അമിത് ഷാ നേരത്തെ വ്യക്തമാക്കിയിരുന്നു. എന്നാൽ, അദ്ദേഹം സഭയിലെത്തിയത് സമ്മേളനത്തിന്റെ അവസാന ദിവസം മാത്രമായിരുന്നു. സഭ ചേർന്നതിന് പിന്നാലെ കാര്യമായ ചർച്ചകളൊന്നും നടക്കാതെ വന്ദേമാതരം ആലപിച്ച് സമ്മേളനം പിരിയുകയായിരുന്നു. അതേസമയം, നീറ്റ് വിഷയത്തിലും വിദ്യാർഥി പ്രതിഷേധങ്ങളിലുമുള്ള സർക്കാർ നിലപാടിനെതിരെ പ്രതിപക്ഷം ശക്തമായ പ്രതിഷേധമാണ് നടത്തിയത്. സഭയ്ക്കുള്ളിൽ ഭരണപക്ഷ-പ്രതിപക്ഷ അംഗങ്ങൾ നേർക്കുനേർ എത്തിയപ്പോൾ, പാർലമെന്റ് വളപ്പിലെ മകർ ദ്വാറിന് മുന്നിലും പ്രതിപക്ഷം പ്രതിഷേധം സംഘടിപ്പിച്ചു. പ്രധാനമന്ത്രിയും ആഭ്യന്തര മന്ത്രിയും വിഷയത്തിൽ സഭയിൽ മറുപടി പറയാതെ ഒഴിഞ്ഞുമാറുകയാണെന്നായിരുന്നു പ്രതിപക്ഷത്തിന്റെ ആരോപണം.
സഭയിൽ ബഹളം തുടരുന്നതിനാൽ അമിത് ഷാ എത്തില്ലെന്ന് പാർലമെന്ററി കാര്യ മന്ത്രി കിരൺ റിജിജു നേരത്തെ അറിയിച്ചിരുന്നു. എന്നാൽ, അവസാന നിമിഷം ആഭ്യന്തര മന്ത്രി സഭയിലെത്തി. ഇതോടെ നീറ്റ് വിഷയത്തിൽ ചർച്ചയും വിശദീകരണവും ഉണ്ടാകുമെന്ന പ്രതീക്ഷ ഉയർന്നെങ്കിലും അതുണ്ടായില്ല. പ്രതിപക്ഷത്തിന്റെ ചോദ്യങ്ങൾക്ക് മറുപടി നൽകാതെയും പ്രത്യേക പ്രസ്താവന നടത്താതെയുമാണ് സമ്മേളനം അവസാനിച്ചത്
