ന്യൂഡല്ഹി: ആം ആദ്മി പാര്ട്ടിയില് നിന്ന് രാജിവെച്ച് ബിജെപിയില് ചേര്ന്ന ഏഴ് രാജ്യസഭാ എംപിമാരെ അയോഗ്യരാക്കണമെന്ന ആവശ്യവുമായി എഎപി നേതൃത്വം. പാര്ട്ടി അച്ചടക്ക നടപടി നേരിട്ട രാഘവ് ഛദ്ദയുടെ നേതൃത്വത്തില് ഏഴ് എംപിമാര് ബിജെപിയില് ചേര്ന്നത് രാഷ്ട്രീയ വൃത്തങ്ങളില് വലിയ ചര്ച്ചയായിരിക്കുകയാണ്. ഈ സാഹചര്യത്തില് മുതിര്ന്ന എഎപി നേതാവും എംപിയുമായ സഞ്ജയ് സിംഗ് രാജ്യസഭാ ചെയര്മാന് സി.പി. രാധാകൃഷ്ണന് അയോഗ്യത ആവശ്യപ്പെട്ട് കത്ത് നല്കി. എംപിമാരുടെ നടപടി പത്താം ഷെഡ്യൂള് പ്രകാരമുള്ള കൂറുമാറ്റ നിരോധന നിയമത്തിന്റെ നഗ്നമായ ലംഘനമാണെന്നാണ് ആം ആദ്മി പാര്ട്ടിയുടെ വാദം.
വെള്ളിയാഴ്ചയാണ് രാഘവ് ഛദ്ദയെ കൂടാതെ അശോക് മിത്തല്, സന്ദീപ് പഥക്, ഹര്ഭജന് സിംഗ്, രാജേന്ദ്ര ഗുപ്ത, വിക്രം സാഹ്നി, സ്വാതി മാലിവാള് എന്നിവര് എഎപിയില് നിന്ന് രാജിവെച്ച് ബിജെപി പാളയത്തിലെത്തിയത്. അരവിന്ദ് കെജ്രിവാളിന്റെ നേതൃത്വത്തിലുള്ള പാര്ട്ടി അതിന്റെ സ്ഥാപക തത്വങ്ങളില് നിന്നും അടിസ്ഥാന മൂല്യങ്ങളില് നിന്നും വ്യതിചലിച്ചുവെന്നാണ് കൂറുമാറിയ എംപിമാരുടെ ആരോപണം. രാജ്യസഭയില് ആകെ പത്ത് അംഗങ്ങളുള്ള എഎപിയില് നിന്ന് ഏഴ് പേര് ഒരേസമയം കൂറുമാറിയത് പാര്ട്ടിക്ക് ദേശീയ തലത്തില് വലിയ തിരിച്ചടിയായി മാറിയിട്ടുണ്ട്.
അതേസമയം, നിയമപരമായ പഴുതുകള് ഉപയോഗിച്ച് അയോഗ്യതയില് നിന്ന് രക്ഷപ്പെടാനാണ് രാഘവ് ഛദ്ദയുടെ നേതൃത്വത്തിലുള്ള സംഘം ശ്രമിക്കുന്നത്. ആകെയുള്ള അംഗങ്ങളില് മൂന്നില് രണ്ട് ഭാഗം ആളുകള് ഒരുമിച്ച് മറ്റൊരു പാര്ട്ടിയില് ലയിക്കുകയോ മാറുകയോ ചെയ്താല് കൂറുമാറ്റ നിരോധന നിയമം ബാധകമാകില്ലെന്ന് ഇവര് അവകാശപ്പെടുന്നു. പത്തില് ഏഴ് പേര് മാറിയതിനാല് തങ്ങളുടെ അംഗത്വം സുരക്ഷിതമാണെന്നാണ് ഛദ്ദയുടെ വാദം. എന്നാല്, ഈ വാദത്തെ രാഷ്ട്രീയമായും നിയമപരമായും നേരിടാനാണ് ആം ആദ്മി പാര്ട്ടിയുടെ തീരുമാനം.
ഭരണഘടനാ വിദഗ്ധരായ കപില് സിബല്, ലോക്സഭ മുന് സെക്രട്ടറി ജനറല് എന്നിവരുമായി എഎപി നേതൃത്വം ചര്ച്ചകള് നടത്തിക്കഴിഞ്ഞു. രാജ്യസഭാ അംഗങ്ങളായി തിരഞ്ഞെടുക്കപ്പെട്ടവര് ജനഹിതത്തെ വഞ്ചിച്ചുകൊണ്ട് മറ്റൊരു പാര്ട്ടിയിലേക്ക് പോകുന്നത് ഭരണഘടനയുടെ ആത്മാവിന് വിരുദ്ധമാണെന്ന് സഞ്ജയ് സിംഗ് വാര്ത്താസമ്മേളനത്തില് പറഞ്ഞു. എംപി സ്ഥാനം രാജിവെക്കാതെ ബിജെപിയില് ചേര്ന്നത് അംഗീകരിക്കാനാവില്ലെന്നും ജനാധിപത്യ മൂല്യങ്ങള് ഉയര്ത്തിപ്പിടിക്കാന് ഇവരെ അയോഗ്യരാക്കുകയല്ലാതെ മറ്റ് മാര്ഗ്ഗമില്ലെന്നുമാണ് പാര്ട്ടി നിലപാട്.
കൂറുമാറിയ ഏഴ് എംപിമാരില് ആറ് പേരും പഞ്ചാബില് നിന്നുള്ളവരാണെന്നത് പഞ്ചാബ് രാഷ്ട്രീയത്തിലും വരും ദിവസങ്ങളില് വലിയ ചലനങ്ങള് ഉണ്ടാക്കിയേക്കാം. എഎപി ടിക്കറ്റില് വിജയിച്ച ശേഷം പാര്ട്ടിക്ക് ഭൂരിപക്ഷമുള്ള സഭയില് നിന്ന് മറ്റൊരു പാര്ട്ടിയിലേക്ക് ചേക്കേറുന്നത് വോട്ടര്മാരോടുള്ള വഞ്ചനയാണെന്ന് എഎപി ആരോപിക്കുന്നു. രാജ്യസഭാ ചെയര്മാന് ഈ പരാതിയില് എന്ത് നടപടി സ്വീകരിക്കും എന്നതിനെ ആശ്രയിച്ചിരിക്കും ഈ എംപിമാരുടെ ഭാവി. നിയമപോരാട്ടത്തിലൂടെ ഇവരെ പുറത്താക്കാന് സാധിക്കുമെന്ന ഉറച്ച വിശ്വാസത്തിലാണ് ആം ആദ്മി പാര്ട്ടി.
